تازا ترين
  • *ملڪ ۾ ڪورونا وائرس وڌيڪ 67 ڄڻن کان حياتيون کسي ورتيون*
  • *سنڌ جي مختلف شهرن ۾ رولو ۽ ڇتن ڪتن جو آزار گهٽجي نه سگهيو، 20 کان وڌيڪ ٻاڙن ۽ عورتن کي ڇتن ڪتن ڏاڙهي زخمي ڪري ڇڏيو*لاڙڪاڻي ۾ ڪتن ٻن ٻارڙن سميت 4 ڄڻن کي ڏاڙهي وڌو، متاثرن ۾ 6 ورهين جي خوشبو شيخ، 13 سالن جو ناصر، 50 سالن جو اختيار ۽ ٻيا شامل*موري ۾ راند ڪندڙ نينگر کي رولو ڪتي ڏاڙهي زخمي ڪري ڇڏيو، زخمي نينگر کي سندس والد کڻي اسپتال پهتو جتي وئڪسين نه ملڻ ڪري واپس گهر روانو ٿي ويو*

ڪمند جا اگهه پنجاب کان وڌيڪ مقرر ڪنداسين: زراعت کاتي جي وزير ماڪڙ مار اسپري ۾ لاچاري ظاهر ڪري ڇڏي

ڪراچي (اسٽاف رپورٽر) زراعت کاتي جي وزير اسماعيل راهو ماڪڙ هٿان فصل ناس ٿيڻ جو اعتراف ڪندي ماڪڙ مان جان ڇڏائڻ کان لاچاري ظاهر ڪري ڇڏي. اسماعيل راهو چيو آهي ته سروي کانپوءِ نقصان جي معاوضي جي سفارش ڪئي ويندي، وفاقي سرڪار هڪڙو جهاز ڏنو، اُن جو به رڳو تيل ختم ٿي وڃي ٿو.
اسپيڪر آغا سراج دراني جي صدارت هيٺ سنڌ اسيمبلي جي اجلاس دوران ڪمند جا اگهه اڃا تائين مقرر نه ٿيڻ ۽ صوبي ۾ ماڪڙ مار اسپري مهم شروع نه ٿيڻ بابت سوال پُڇيا ويا، جِن جا جواب ڏيندي زراعت کاتي جي صوبائي وزير اسماعيل راهو دعويٰ ڪئي ته سنڌ سرڪار پنجاب جي ڀيٽ ۾ ڪمند جا وڌيڪ اگهه مقرر ڪندي، ڪمند جا اگهه سنڌ ڪابينا جي اجلاس ۾ مقرر ڪيا ويندا. سندس چوڻ هو ته گذريل سال ڪمند جو في مڻ اگهه 182 رُپيا مقرر ڪيو ويو هو. عارف مصطفيٰ جو چوڻ هو ته ڇاڪاڻ ته سنڌ ۾ عوامي حڪومت آهي، تنهن ڪري ڪمند جو في مڻ اگهه اڍائي سئو رُپيا مقرر ڪيو وڃي.
ماڪڙ مار اسپري مهم تي حڪومت جو جواب
جي ڊي اي ايم پي اي نصرت سحر عباسي جي سوال تي جواب ڏيندي صوبائي وزير اسماعيل راهو چيو ته ماڪڙ مار اسپري جي حوالي سان وفاقي سرڪار کي ڪيترائي ڀيرا خط لکيا،جڏهن ته فيڊرل پلانٽ پروٽيڪشن وارن کان به 2 ايئر ڪرافت گهريا. هن چيو ته سنڌ ۾ ماڪڙ مار اسپري لاءِ رڳو هڪڙو ايئر ڪرافٽ موڪليو ويو، اُن جو به تيل ختم ٿي وڃي ٿو، ڪڏهن وري دوائون ختم ٿي وڃن ٿيون، جِن دوائن سان اسپري ٿي رهيو آهي، اهي ماڪڙ کي مارڻ نه پر ڀڄائڻ واريون آهن.
وفاق کي هڪ ڪروڙ رُپيا ڀاڙي جا به ڏئي ڇڏيا
سنڌ اسيمبلي جي اجلاس ۾ صوبائي وزير اسماعيل راهو دعوي ڪئي ته وفاقي سرڪار طرفان جهازن جي ڀاڙي لاءِ هڪ ڪروڙ رُپيا گهريا ويا، اُهي به ڏئي ڇڏيا، وري چيو ويو ته دوائن لاءِ پئسا نه آهن، ڊسمبر جي آخر ۾ گرانٽ جاري ٿيندي، سنڌ حڪومت پئسا ڏيڻ جي آڇ ڪري چڪي آهي.
نومبر ۾فصلن کي گهڻو نقصان ٿيو
زراعت کاتي جي صوبائي وزير سنڌ اسيمبلي ۾ اعتراف ڪيو ته نومبر مهيني ۾ ماڪڙ فصلن کي تمام گهڻو نقصان پهچايو آهي، جڏهن ته آڪٽوبر ۽ اُن کان اڳ گهڻو نقصان نه ٿيو هو. هُن چيو ته ماڪڙ سبب فصلن کي ٿيل نقصان جي سروي ڪرائڻ جو فيصلو ڪيو ويو آهي، اُن کانپوءِ متاثرن کي معاوضو ڏيڻ جي سفارش ڪئي ويندي.

Bookmark the permalink.