تازا ترين
  • *روهڙي ۾ سڱاوتي تڪرار تان جيڪب آباد واسي ڪُهي قتل*

مافياز جي گھيري ۾ آيل تبديلي سرڪار !

احتساب جي تيز رفتار گھوڙي تي سوار ٿي وزيراعظم بڻيل عمران خان کي شايد گمان ۾ نه هو ته پاڪستان جي حڪومت ھلائڻ سندس لاءِ ڪو ايڏو ڏکيو ڪم ثابت ٿيندو، ڇاڪاڻ ته اسلام آباد جي ڊي چوڪ وٽ ڪنٽينر ۾ بيھي عوام کي سنھري خواب ڏيکارڻ ۽ پاڪستان جھڙي گھڻ طرفي بحرانن کي منھن ڏيندڙ رياست جو ڪاروھنوار ھلائڻ ۾ ڏينھن رات جو فرق آھي. عمران خان ۽ سندس ٽيم حڪومت ۾ اچڻ کان پھرين جنھن قسم جون ھوائي ڳالھيون ڪيون ھيون، انھي ذريعي ھو نوجوان برگر ڪلاس کي ته پنھنجن سياسي جلسن ۾ ڇڪي آيا، جيڪي اڃ لڳڻ تي اسٽنگ بوتل ۽ بک لڳڻ تي زنگر کائي سموري ملڪ کي ڊفينس پيا سمجھندا آھن پر سندس ڳالھين ۾ پاڪستان جي انھي پيڙھيل طبقي لاءِ نجات جو ڪوبه سبق شامل نه ھو جيڪو ڄڻ ته ڄائو ئي بک، ڏک ۽ سور سھڻ لاءِ ھجي. تبديلي سرڪار کي ھن وقت ڪجھ اھڙا مسئلا پڻ درپيش آھن جن کي وزير اعظم چاھيندي به حل نٿو ڪري سگھي ڇاڪاڻ ته انھن مسئلن کي حل ڪرڻ لاءِ کيس پنھنجي پارٽي اندر موجود انھن مافياز سان ٽڪرائڻو ٿو پوي جيڪي تمام گھڻيون طاقتور  ھئڻ سان گڏ چالاڪ پڻ آھن. اھي مافياز ھن وقت حڪومت کي جنھن نموني ڊڪٽيٽ ڪن پيون ان مان سندن طاقت جو اندازو بھتر نموني لڳائي سگھجي ٿو. مثال طور ڪجھ ڏينھن خان صاحب ڀاڻ ڪمپنين کي ھڪ حڪومتي آرڊيننس ذريعي 208 ارب رپين جو قرض معاف ڪيو پر بعد ۾ جڏھن اھا ڳالھ ميڊيا جي گرم بازار جي رونق بڻي ته وزيراعظم انھي آرڊيننس کي اهڙي ريت واپس ورتو ڄڻ اھا ڳالھ سندس ڄاڻ ۾ ئي نه آئي هئي. اھو ته صرف ھڪ مثال ھو پر منھنجي ڪيس اسٽڊي مطابق سگريٽ جي غير قانوني ڪمپنين کان ويندي سموري ملڪ ۾ شگر ملز جي طاقتور مافياز تائين ھر وڏي ڪاروبار ۾ تبديلي سرڪار اندر موجود ماڻھو اھڙي ريت ملوث نظر ٿا اچن ڄڻ کين انھن ڪمن جي ڇوٽ مليل ھجي. ڪجھ ڏينھن پھرين ئي وزيراعظم سان مليل اھو صحافي ٻڌائي ٿو ته خان صاحب سان ٿيل سندس  انھي ملاقات ۾ وزير اعظم ڪيترن ئي اھم معاملن کان اھڙي ريت لاتعلقي ظاھر ڪئي ڄڻ انھن اھم ۽ حساس معاملن کي ھلائڻ جون چاٻيون خان صاحب وٽ نه بلڪ انھن ڌرين وٽ ھجن جن عمران خان کي وزيراعظم بڻائڻ تي پئسو لڳايو آھي. بهرحال جھانگير ترين کان ويندي اعظم سواتي تائين ھر سرمائيدار جنھن نموني پي ٽي آءِ سرڪار جي پاليسين جو رخ موڙي رھيو آھي انھي مان پاڪستان جو عوام ٻه ڳالھيون ته بھتر نموني محسوس ڪري سگھي ٿو، ھڪ ته پاڻ انھن فردن جي طاقت جو اندازو لڳائي سگھون ٿا ته اھي ڌريون ڪيئن موجودھ حڪومت کي ڪنٽرول ھيٺ رکي ذاتي ۽ گروھي مفاد حاصل ڪن ٿيون ۽ ٻيو تبديلي سرڪار ۽ خاص طور تي عمران خان جي انھن طاقتور ڌرين آڏو بيوسي کي پڻ محسوس ڪري سگھجي ٿو.

Bookmark the permalink.

Leave a Reply

Your email address will not be published. Required fields are marked *