تازا ترين
  • *ڊپٽي ڪمشنر ملير پاران چئن مهينن کان گلشن حديد ۾ لڳايل لاڪ ڊائون هڪ هفتي لاءِ ختم ڪري ڇڏيو *ڊي سي ملير ايم پي اي ساجد جوکيو ۽ واپاري اڳواڻن سان ڳالهين بعد اهڙو فيصلو ڪيو *ڪورونا ڪيس وڌڻ جي صورت ۾ ٻيهر لاڪ ڊائون ڪيو ويندو: ڊي سي ملير *
  • *لاڙڪاڻي ۾ ڳوٺاڻن جو بااثرن جي مبينا زيادتين خلاف ڌرڻو، ٽائرن کي باهيون *ڳوٺ نهال واسين بااثرن خلاف جناح باغ چوڪ تي ٽائرن کي باھيون ڏئي روڊ بلاڪ ڪري ڇڏيو *بااثر گهر ۾ گهڙي عورتن تي وحشياڻو تشدد ڪري ڀڃ ڊاهه ڪئي: مظاهرين *
  • *نواب ولي محمد ويجهو وونئڻن جي فصل کي اسپري ڪرڻ دورن بيهوش ٿي ويل نينگر دم ڏئي ڇڏيو *ڳوٺ حسين بخش چانڊيو ۾10 ڏينهن اڳ نينگر عمران چانڊيو فصل کي اسپري دوران بيهوش ٿي ويو هو *نينگر اڄ نوابشاهه اسپتال ۾ دم ڏنو*
  • *مٽياري: عدالت پاران محب کوسو قتل ڪيس ۾ ٻن جوابدارن جي ضمانت واري درخواست رد *جوابدار علي محمد کوسو ۽ خان محمد کوسو عدالت ۾ وڪيل معرفت ضمانت لاءِ درخواست داخل ڪرائي هئي *2019 ۾ کوسا برادري جي ٻن ڌرين ۾ جهيڙي دوران محب کوسو مارجي ويو هو *مقتول جي ڌيءُ عائشه کوسو جي فرياد تي نيو سعيدآباد ٿاڻي تي ڪيس داخل ڪيو ويو هو*
  • *سڪرنڊ ۾ آبادگارن پاران پاڻي کوٽ خلاف ايريگيشن آفيس اڳيان ڌرڻو، ٽائرن کي باهيون*
  • *سنڌڙي: هوٽل مان هڪ شخص جو لاش هٿ، اسپتال منتقل *مگسي ھوٽل مان پيرونمل واسي 50ورھين جي شاھنواز ڳاھو جو لاش هٿ *
  • *ٽنڊوغلام علي ويجهو نوجوان ڦاهو کائي آپگهات ڪري ڇڏيو *ديھه واڳھريجي ۾ 26 ورهين جي اشوڪ پٽ اجمل ٺاڪر بيماري کان تنگ اچي زندگي جو ڏيئو اجهايو*
  • *مٺياڻي رورل هيلٿ سينٽر جون 4 ليڊي هيلٿ ورڪرز ڪورونا جو شڪار *ڪورونا ۾ مبتلا ليڊي هيلٿ ورڪرز کي سندن گهرن ۾ آئيسوليٽ ڪيو ويو *مٺياڻي ۾ ڪورونا متاثرن جو انگ وڌي 10 ٿي ويو*
  • *ميرپورخاص ضلعي ۾ ڪورونا وائرس جا وڌيڪ 50ڪيس ظاھر، متاثرن جو انگ 850 ٿي ويو*
  • *ڪوٽ غلام محمد ۾ چوپائي مال جي پڙي لڳائي وئي، مالوندن ۽ واپارين جي پيهه *مال پڙي تي سوين مالوند ۽ واپاري پهچي ويا، سماجي وٿي وارا اصول نظرانداز*
  • *ڪشمور ضلعي ۾ ڪورونا وائرس جا وڌيڪ 26 ڪيس ظاهر، متاثرن جو انگ 489 ٿي ويو *ڪجهه ڏينهن اڳ 169ماڻهن جا سيمپل ورتا ويا هئا، 26ڄڻن ۾ وائرس جي تصديق ٿي: فوڪل پرسن*
  • *ڪرمپور :ڳوٺ عمران خان بجاراڻي وٽ نصير شاخ کي 15فوٽ گهارو پئجي ويو *گهاري سبب سوين ايڪڙن تي پوکيل ساريالو فصل ۽ ٻيجارو پاڻي هيٺ اچي ويو *اطلاع باجود آبپاشي عملو نه پهتو،ڳوٺاڻا پنهنجي مدد پاڻ تحت گهارو بند ڪرڻ ۾ رُڌل *
  • *ڪراچي: ڊيري فارم ائسوسيئيشن جي صدر جو ڪمشنر ڪراچي کي چئلينج *کير جي اگهن ۾ واڌ وارو فيصلو واپس نه ورتو آهي: ڊيري فارم ائسوسيئيشن صدر *دٻاءُ وجهڻ جي ڪوشش ڪئي ته سُپر هاءِ وي ۽ نيشنل هاءِ وي تي مينهون بيهاري ڇڏينداسين: شاڪر عمر گجر*
  • *جوهي ۾ پاڻي کوٽ خلاف آبادگارن پاران احتجاجي ريلي ڪڍي وئي *پڇڙي جي آبادگارن هڪ ڪلو ميٽر ريلي ڪڍڻ بعد علامتي بک هڙتال تي ويهي رهيا *
  • *ڄامشورو ۾ وڌيڪ 17ڪورونا جا ڪيس ظاھر، متاثرن جو انگ وڌي 865ٿي ويو *گذريل ڏينھن 113ماڻهن جا سيمپلز ورتا ويا هئا، 17 ڄڻن ۾ وائرس جي تصديق ٿي *متاثرن ۾ مانجھند، ٿاڻوبولاخان واسي ۽ ڪوٽڙي جا رهواسي شامل آھن *

سنڌ جي دبئي ۾ بي پهچ وڏيرا…امين ارباب

حيدرآباد جي اُترين حصي ۾ محمد بن قاسم جي نالي سان منسوب قاسم آباد جنهن جي اﷲ بخش مگسي ۽ ناليواري فلم اسٽار شاهنواز گھمن کان پوءِ جڏهن ڪراچي جي ڪاٺياواڙي بلڊر اڏاوت ڪندي ڪجھه ڪالونيون ٺاهيون ئي پئي ته لنڊن واري ڀائي جان کيس اهو چئي ڪالونين جا ڪم بند ڪرائي ڇڏيا هئا ته هو حيدرآباد ۾ سنڌين جو هڪ ٻيو حيدرآباد قطعي ٺهڻ نه ڏيندو. سنڌي قوم پرست پارٽين پاران سنڌي ماڻهن کي قاسم آباد ۾ آباد ڪرڻ ۽ ايم ڪيو ايم پاران قاسم آباد ۾ سنڌين کي آباد ٿيڻ کان روڪڻ جي ويڙهاند ۾ جڏهن قاسم آباد ڪراچي جي لياري جي صورت اختيار ڪرڻ لڳو ته ڪراچي جي بلڊر سميت سڀني بلڊرن، واپارين، ڊاڪٽرن ۽ مال ڪمائو ڪامورن قاسم آباد ۾ رهڻ ۽ ڪاروبار ڪرڻ واري ڏانءُ کي سمجهي به ورتو ۽ لنڊن واري ڀائي جان سميت سنڌ جي سمورن قومپرست اڳواڻن سان بلڊر مافيا ماهوار معاملا طئي ڪري ورتا ۽ پوءِ ڏسندي ئي ڏسندي قاسم آباد حيدرآباد جي ڇاتيءَ تي ائين اڀري کڻي اڳيان آيو جيئن سنڌ جي سرموڙ شاعر شاھه عبداللطيف ڀٽائي جي نالي سان منسوب ڪيل شهيد ذوالفقار علي ڀٽي پاران ذاتي شوق سان باقاعده شهري رٿا بندي تحت اڏيل شاھه لطيف آباد سالن لاڪون حيدرآباد جي نقشي تي اڀريل ئي پيو نظر اچي.
حيدرآباد ۾ لطيف آباد جو نعم البدل قاسم آباد اُهو سنڌين جو ذاتي نئون ۽ نج علائقو هو جيڪو جڙي ٺهي راس ٿيندي ئي اُجاڙ جي عمل جو نشانو بڻيو، هن وقت قاسم آباد جي سول سوسائٽي سالن کان اقتدار ۾ ويٺل پيپلزپارٽي تي آڱريون کنيون آهن ته پيپلزپارٽي به پاڻ تان بار لاهڻ لاءِ وضاحت به ڪئي آهي ته هن علائقي کي نظر انداز ڪرڻ ۾ پيپلزپارٽي نه پر ايم ڪيو ايم جي اڳوڻي ناظم ڪنور نويد جميل جو ئي هٿ هو جنهن تعصب جي بنياد تي قاسم آباد بجاءِ رڳو لطيف آباد ۾ ئي ترقياتي ڪم ڪرايا پر انهيءَ دليل کي هن علائقي جا رهواسي اهو چئي هيئن بحث هيٺ آڻيندا اچن ته ايم ڪيو ايم تي ميار پيپلزپارٽي جي ٺهي نٿي جو اهي ٻئي پارٽيون ڪافي وقت کان هڪٻئي کان رسنديون ۽ پرچنديون رهيون آهن پر سوال اهو به آهي ته پيپلزپارٽي گذريل 12 سالن کان سنڌ ۾ اڇي ۽ ڪاري جي مالڪ آهي ته پوءِ کيس ڪنهن روڪيو آهي ته هو سنڌ جي دبئي يعني قاسم آباد ۾ ترقياتي ڪم ڪرائي بنيادي مسئلا حل نه ڪرائي.
قاسم آباد جو مک دروازو پل جي نالي ۾ بند ڪيو ويو، پيپلزپارٽي ۽ قوم پرست پارٽين جا مک ليڊر جيڪي اڪثر قاسم آباد ۾ ڪٽنب سميت رهن ٿا اکر ڪونه ڪڇو، ڪروڙين روپين جون واڌو واھ تي بي تُڪيون پُلون جن تي اڃان تائين ٽريفڪ هلڻ لاءِ تيار ئي ناهي، ٺاهيون پئي ويون، هتان جي نه ايڪشن ڪميٽي ڪڇيو، نه هنڀوڇيون هڻندڙ ڪنهن ڪامريد کڻي ڪڏهن دانهن ڪئي. سنڌ جي مهانگي ۾ مهانگي هن علائقي تي نظر ڦيرائبي ته توهان کي ڏندين آڱريون انهيءَ ڪري اچي وينديون جو هيڏن بااثر ماڻهن جي هوندي سوندي سنڌ جو هي انمول علائقو اڄ ڏينهن تائين ڪني پاڻي ۽ نيڪاسي جي ناڪاره نظام جي ور ڇو چڙهيل آهي .قاسم آباد جي فيز ون ۾ ملڪ جي اڳواڻي صدر آصف علي زرداري جي ڀيڻ فوزيا زرداري جي رهائش گاهه آهي پر گهر اڳيان حالت اھا آھي جو ماڻهو پيرين پنڌ به هلي نه سگهبو. ،ساڳئي علائقي ۾ اڳوڻي مملڪتي وزير شگفتا جماڻي جو گهر آهي پر پوءِ به هن کان پڇندئو ته محترما فرمائيندي ته ڇا ڪريون ايم ڪيو ايم جي ناطمي نظام اسان کي نظر انداز ڪري ڇڏيو هو. سنڌ جي اڳوڻي وڏي وزير لياقت علي جتوئي جي فرزند ۽ اڳوڻي دادو ضلعي جي ناظم ڪريم بخش جتوئي کان وٺي شيرازين جي چشم چراغ ۽ هاڻوڪي ايم اين اي اياز شاھه شيرازي ۽ اڳوڻي ايم اين اي عبدالستار سريوال جا گهر به قاسم آباد ۾ ئي آهن پر هنن جي ڊرائنگ رومز تائين پهچڻ لاءِ توهان کي نڪ تي هٿ ضرور ڏيڻو پوندو. اڃان به جيڪڏهن توهان قاسم آباد جي اجڙي ويل رستن ۽ ڪنين گهٽين ۾ جهاتي پائيندو ته توهان کي سنڌ جي اڳوڻي حڪمران مير بندهه علي خان ٽالپر جي پٽ ۽ پيپلزپارٽي جي اڳوڻي ايم پي اي مير بابو ۽ هاڻوڪي ايم اين اي مير غلام علي ٽالپر جائي پري کان محل نما گهر نظر ايندا.
قاسم آباد جي ڪنين ۽ ڌپ وارين گهٽين مان ٿي جڏهن گلشن حبيب وٽ پيپلزپارٽي جي سينيٽر مولا بخش چانڊيي، عمرڪوٽ جي پ پ اڳواڻ نواب يوسف خان ٽالپر، مٽياري جي اڳوڻي ايم پي اي امير علي شاھه هاشمي ۽ پ پ جي اڳواڻي ايم اين اي سيد امير علي شاھه ڄاموٽ جا گهر ڏسڻ ۾ ايندا جن جي سونهن سلامتي جي ڪهڙي ڳالھه ڪجي پر جيڪڏهن ڪو مهمان هنن جي گهر آيو هوندو ته يقينن اهو سندس پھريون ۽ آخري ڀيرو هوندو. حيدرآباد جي ٻهراڙي تعلقي جي پ پ جي اڳوڻي ايم پي اي سيد امجد علي شاھه ڄاموٽ جي رهائش گاهه کان وٺي گلستان سجاد ۾ ٽنڊي الهيار سان واڳيل پيپلزپارٽي جي اڳوڻي صوبائي وزير سيد علي نواز شاهه رضوي جي گهر تائين، پيپلزپارٽي ليڊيز ونگ جي اڳوڻي ايم پي اي فرحين مغل کان وٺي سٽيزن ڪالوني ۾ فنڪشنل ليگ جي ان وقت جي مملڪتي وزير فقير جادم مڱرئي جي گهر تائين، جي ايم بي ڪالوني ۾ اڳوڻي ايم اين اي ارباب ذڪاءُ ﷲ جي رهائش گاهه کان وٺي اڳوڻي ايم اين اي شمشاد بچاڻي ۽ هاڻوڪي ايم اين اي ستار بچاڻي جي رهائش گاهه تائين، اڳوڻي صوبائي وزير ۽ ضلعي ٿرپارڪر جي اڳواڻي ناظم ارباب عطا ﷲ جي رهائش گاهه کان وٺي وڏن وڏن عهدن تي فائز سنڌي ڪامورن، اڳوڻي آءِ جي غلام حيدر جمالي، اڳوڻي ڊي آءِ جي سائين رکئي ميراڻي، غلام قادر ٿيٻي، ثناءُ ﷲ عباسي ۽ ٻين ڪامورن جي شاهڪار بنگلن تائين قاسم آباد ۾ اڳوڻن ۽ هاڻوڪن اقتداري سنڌي ماڻهن جي گهرن جون اهڙيون ته قطارون آهن جن کي ڏسي توهان کي مورن جا پير ضرور ياد ايندا.
ڪرسين تي ويٺل واڳ ڌڻين جي گهرن جو ڏس پتو پڇا ڪندو ته توهان کي علي پئليس ڀرسان الواحد ٽائون ۾ پيپلزپارٽي جي اڳوڻي صوبائي وزير ۽ هاڻوڪي ايم پي اي امداد پتافي جو گهر پري کان ڏسڻ ۾ ايندو پر گهر تائين پهچڻ لاءِ پيرن کي زوري مڃرائڻو پوندو ڇاڪاڻ جو قاسم آباد ۾ پ پ جي هاڻوڪي سينيٽر ۽ اڳوڻي صوبائي وزير ڊاڪٽر سڪندر منڌري جي گهر وانگر پ پ جي اڳوڻي ايم پي اي سرجيلا لغاري جي گهرن تائين پهچڻ لاءِ جيڪي سور کائڻا پوندا اهو به ڪنهن کان ڳجهو ڪونهي. کنڊر ۾ تبديل ٿي ويل رستا، کليل گٽر ۽ چوڌاري ڪنو پاڻي ڏسي ڪنهن کي اعتبار به نه ايندو ته هتي به ڪي پ پ جا اسيمبلي ميمبر ۽ وزير صاحبان رھن ٿا. قاسم آباد جي گندگي جي ڍير ۾ خوبصورت محلاتن جهڙا اڃان به اقتداري سنڌي ڀائرن جا گهر ڳوليندو ته توھان کي قاسم آباد جي نسيم نگر واري علائقي اسٽار بنگلوز ۾ به وڃڻو پوندو جتي اڳوڻي صوبائي وزير عرفان گل مگسي جي ڀيڻ ۽ ٽنڊي الهيار ضلعي جي اڳواڻي ناطما ۽ سينيٽر راحيلا مگسي جي رهائش گاهه يعني مگسي هائوس نمبر ٽو تي نظر پوندي، ڇا ته گهر آهي پر مهرباني ڪري دروازي جي اڳيان نه لنگهجو.
قاسم آباد ۾ رهندڙ هاڻوڪا اقتداري ڪرسين تي ويٺل سنڌي هجن يا اڳوڻا پر گهٽايو اسان جي قومپرستن ۽ سماجي اڳواڻن به ناهي، پرنس ٽائون ۾ رسول بخش پليجي ۽ اياز لطيف پليجي جي گهر کان وٺي اسٽيٽ لائيف ڪالوني ۾ مقيم ڊاڪٽر قادر مگسي جي گهر تائين، ترقي پسند هائوس ويجهو سيد جلال شاھه ۽ بشير خان قريشي جي بنگلي کان وٺي جيجل ماءُ اسپتال ڀرسان ممتاز ڀٽي ۽ عبدالله ٽائون ۾ ڊاڪٽر دودو مهيري جي رهائش گاهه تائين وڏن دٻدٻن وارن قومپرست نالن جي اهڙي ته ڊگهي قطار آهي جن جا گهر قاسم آباد ۾ موجود آهن پر مجال آهي جو ڪڏهن ڪا ڪوڪ ڪئي هجين، ڪا دانهن ڪئي هجين ته سنڌ جي هن دبئي سان هيڏي وڏي ناانصافي ڇو…؟؟؟؟؟

This entry was posted in Feature Story. Bookmark the permalink.

Leave a Reply

Your email address will not be published. Required fields are marked *