تازا ترين
  • *دولتپور صفن ۾ رولو ڪتن جو آزار، 8 ڄڻن کي ڏاڙهي زخمي ڪري ڇڏيو *ڳوٺ مٺا خان جوکيو ۾ ھڪ ئي 8 ڄڻن کي ڪتي ڏاڙھي زخمي ڪيو، اسپتال منتقل*
  • *ملير: قائد آباد پل تي ڪوچ ۽ موٽر سائيڪل وچ ۾ ٽڪر، هڪ ڄڻو فوت، هڪ زخمي *فوتي جي سڃاڻپ 28 ورهين جي وسيم پٽ ناصر طور ٿي *
  • *جھول ۾ بدامني خلاف ٿاڻي آڏو سول سوسائٽي جو احتجاج *چوريون ۽ ڦرون روز جو معمول بڻيل آهن: احتجاج ڪندڙ *
  • *دوڙ تعلقي ۾ ڪورونا وائرس جا وڌيڪ 9 ڪيس ظاهر، متاثرن جو انگ 150 ٿي ويو: فوڪل پرسن *متاثرن کي پنهنجي گهرن ۾ آئيسوليٽ ڪيو پيو وڃي: فوڪل پرسن *
  • *نصيرآباد: ڪورونا جا ڪيس ظاهر ٿيڻ بعد صحت کاتي پاران ماڻهن جا سيمپلز وٺڻ وارو عمل جاري *شهر ۽ ڀرپاسي جي ڳوٺن ۾ صحت کاتي جي ٽيم 200کان وڌيڪ ماڻهن جا سيمپلز ورتا *رپورٽس ڪجهه ڏينهن اندر اينديون: صحت کاتو *
  • *سانگهڙ: اينٽي ڪرپشن ٽيم جو يونين ڪائونسل هٿونگو جي آفيس تي ڇاپو *اينٽي ڪرپشن ٽيم يوسي هٿونگو جي چيئرمين ۽ سيڪريٽري جي گرفتاري لاءِ ڇاپو هنيو *
  • *ڄام صاحب: ڪورونا جا 4ڪيس ظاهر، متاثر گهرن ۾ آئيسوليٽ *متاثرن ۾ 2 پوليس اھلڪار به شامل *
  • *ننگرپارڪر ويجهو نوجوان جو لاش هٿ *ڳوٺ خانپور ۾21 ورهين جي ھريش پٽ ڪٽيو ڪولھي جو لاش ھٿ *نوجوان کي پيٽ ۾ چاقو لڳل آهي: پوليس *پٽ رات ماني کائي 3 دوستن سان گڏ نڪتو ھو، صبح جو لاش مليو آھي: پيءُ *پٽ کي قتل ڪيو ويو آھي، انصاف ڪيو وڃي: ڪٽيو ڪولھي *
  • *ٺٽو واٽر سپلاءِ اسڪيم ريفرنس: آصف زرداري طرفان فرد جرم لاڳو ٿيڻ لاءِ عدالت ۾ پيش ٿيڻ کان معذرت *آصف زرداري ڪورونا ۽ ٻين بيمارين سبب پيش نٿو ٿي سگهي: وڪيل جي احتساب عدالت کي آگاهي* احتساب عدالت طرفان آصف زرداري مٿان وڊيو لنڪ ذريعي فردم جرم لاڳو ڪرڻ جو فيصلو * آصف زرداري سوڌو 14 جوابدار 4 آگسٽ تي طلب، نيب کي انتظام مڪمل ڪرڻ جي هدايت *
  • *ميرپورخاص: رحيم نگر مان مڙس جي تشدد کان تنگ ٿي گھران نڪتل ناري ٿاڻي تي پهچي وئي *19ورھين جي ناري راڻي لاگھاڻي سٽلائيٽ ٽائون ٿاڻي پھچي وئي *مڙس سان ھاڻي گڏي رھڻ نٿي چاھيان: ناري راڻي لاگهاڻي *ناري جي مڙس جي چاچي نبي بخش لاگھاڻي ناري جي گم ٿيڻ بابت ٿاڻي تي درخواست ڏني ھئي *
  • *قبوسعيدخان وجهو تيز رفتار ڪار ڪلٽي، 2 ڄڻا زخمي *ٻنهي زخمين کي ڳڻتي جوڳي حالت ۾ شهداڪوٽ اسپتال منتقل*
  • *ٺل ويجهو معمولي ڳالهه تان ٻن ڌرين ۾ جهيڙو، 6ڄڻا زخمي *ڳوٺ جونسال ڪنڊراڻي ۾ ڪنڊراڻي ۽ بنگلاڻي برادري جي ٻن ڌرين ۾ جھيڙو ٿيو*
سموراايونٽ ملتوي ڪري پاڪ-ڀارت سيريزڪرائڻ جومطالبو
پاڪستان جي اڳوڻي فاسٽ بالر شعيب اختر کانپوءِ آسٽريليا جي اڳوڻي اسپنر بريڊ هاگ به ڪورونا وائرس بعد پاڪ-ڀارت سيريز ڪرائڻ جو مطالبو ڪري ڇڏيو

سڊني(اسپورٽس نيوز) شعيب اختر کانپوءِ آسٽريليا جي اڳوڻي اسپنر بريڊ هاگ به ڪورونا وائرس بعد پاڪ-ڀارت ڪرڪيٽ سيريز ڪرائڻ جو مطالبو ڪري ڇڏيو آهي. ان ڏس ۾ اسپنر بريڊ هاگ جو چوڻ آهي ته ڪورونا کانپوءِ ڪرڪيٽ کي پاڪستان ۽ ڀارت جي سيريز گهربل آهي، ان سيريز سان بي پناهه دلچسپي پيدا ٿيندي. بريڊ هاگ جوج چوڻ آهي ته ڪوهلي ۽ بابر اعظم ۾ ڪير بهتر آهي، اهو فيصلو ان سيريز ۾ ٿي ويندو، پاڪ ڀارت سيريز لاءِ مداحن کي به انتظار آهي. هن چيو ته پاڪستان ۽ ڀارت کي 4 ميچن جي سيريز کيڏڻ گهرجي، جنهن ۾ 2 ٽيسٽ پاڪستان ۾ ٿينديون ۽ 2 ٽيسٽ ميچز ڀارت ۾ ڪرايون وڃن. آسٽريليا جي اڳوڻي اسپنر چيو ته مداح ڪجهه دلچسپ ڪرڪيٽ ڏسڻ گهرن ٿا، ورلڊ ٽيسٽ چيمپئن شپ کي في الحال ختم ڪري اهڙي سيريز ڪرائي وڃي، جيڪا واقعي سموري دنيا ۾ دلچسپي پيدا ڪري. هن چيو ته گرمين ۾ ڀارت ۽ آسٽريليا خلاف سيريز به ملتوي ڪئي وڃي ۽ ان بدران ايشيز سيريز ڪرائي وڃي. واضح رهي ته پاڪستان ۽ ڀارت وچ ۾ 2012-13 بعد گڏيل سيريز ناهي کيڏي وئي، ٻئي ٽيمون آءِ سي سي ايونٽ ۾ آمهون سامهون ٿيون هيون. واضح رهي ته ان کان اڳ پاڪستان جي اڳوڻي فاسٽ بالر شعيب اختر ڪورونا متاثرن جي امداد لاءِ پاڪ ڀارت ون ڊي سيريز جي تجويز پيش ڪئي هئي.

احمد شهزاد وزير اعظم جي ٽائيگر فورس جو حصو بڻجي ويو
احمد شهزاد جي سيالڪوٽ ۾ وزير اعظم جي خاص معاون عثمان ڊار سان ملاقات ٿي، مختلف معاملن تي ڳالهيون

سيالڪوٽ(اسپورٽس نيوز) ڪرڪيٽر احمد شهزاد به وزير اعظم ٽائيگر فورس جو حصو بڻجي ويو آهي ۽ وزير اعظم جي قدمن کي وقت جي ضرورت قرار ڏنو آهي، عثمان ڊار چيو ته خوشي آهي ته عوامي سطح تي شعور وڌي رهيو آهي. ڪرڪيٽر احمد شهزاد جي سيالڪوٽ ۾ وزير اعظم عمران خان جي معاون عثمان ڊار سان ملاقات ٿي، ملاقات ۾ احمد شهزاد ٽائيگر فورس جي زبردست پذيرائي تي عثمان ڊار کي واڌايون ڏنيون. احمد شهزاد وزير اعظم جي قدمن کي وقت جي ضرورت قرار ڏنو آهي، عثمان ڊار احمد شهزاد کي ٽائيگر فورس جي حصوصي ڪيپ پارائي ۽ ٽائيگر فورس جي اعزازي ميمبر شپ به ڏني. ياد رهي ته قومي ڪرڪيٽ ٽيم جي بيٽسمين احمد شهزاد وزير اعظم عمران خان جي ٽائيگر فورس ۾ شموليت جي خواهش جو اظهار ڪندي چيو ته عمران خان جيڪڏهن چاهي ته منهنجون خدمتون وٺي سگهي ٿو.

اظهر۽عبدالرزاق عمران خان سان ڊريم پيئرٺاهڻ جي خواهش ظاهرڪري ڇڏي
عمران خان سان گڏ ڊريم پيئر ٺاهڻ چاهيان ٿو، ماضي جي عظيم آل رائونڊرن کي ڏسي ئي مون ڪرڪيٽ کيڏڻ جي شروع ڪئي

لاهور(اسپورٽس نيوز) اڳوڻي آل رائونڊر اظهر محمود ۽ عبدالرزاق عمران خان سان گڏ ڊريم پيئر ٺاهڻ جي خواهش ظاهر ڪري ڇڏي. پاڪستان طرفان 21 ٽيسٽ ميچن ۾ 900 رنسون ۽ 39 وڪيٽون حاصل ڪندڙ اڳوڻي آل رائونڊر اظهر محمود ماضي جي عظيم رانديگرن مان آهي جنهن عمران خان سان گڏ پنهنجي ڊريم جوڙي ٺاهڻ جي خواهش ظاهر ڪئي آهي. 1997ع ۾ پنهنجي ٽيسٽ ڊيبيو جي پهرين اننگز ۾ ڏکڻ آفريڪا جي خلاف نه وسرندڙ سينچري ۽ ٻئي اننگز ۾ ناقابل شڪست نصف سينچري اسڪور ڪري بهترين رانديگر جو ايوارڊ حاصل ڪندڙ اظهر محمود بيٽسمينن ۾ بابر اعظم سان گڏ بيٽنگ ۽ شاهين شاهه آفريدي سان گڏ بائولنگ جوڙي ٺاهڻ جي خواهش جو اظهار ڪيو آهي. اڳوڻي ٽيسٽ رانديگر اظهر محمود جو چوڻ آهي ته مان عمران خان سان گڏ ڊريم پيئر ٺاهڻ چاهيان ٿو. ڇو ته ماضي جي عظيم آل رائونڊرن کي ڏسي ئي مون ڪرڪيٽ کيڏڻ جي شروعات ڪئي هئي.  موهالي ٽيسٽ 2005 ۾ ڀارت جي خلاف 346 منٽ ڪريز تي بيهي پاڪستان کي شڪست کان بچائيندڙ آل رائونڊر عبدالرزاق عمران خان سان گڏ بالنگ جي خواهش جو اظهار ڪيو آهي. 46 ٽيسٽ ميچن مان 1946 رنسون ۽ 100 وڪيٽون حاصل ڪندڙ آل رائونڊر عبدالرزاق ميدان ۾ بيٽنگ جي لاءِ اڳوڻي ڪپتان جاويد ميانداد کي پنهنجي ڊريم پيئر ۾ شامل ڪرڻ جي خواهش ظاهر ڪئي آهي.  هن وڌيڪ چيو ته پاڪستان ڪرڪيٽ بورڊ جو ٿورائتو آهيان جنهن هن  مهم جي ذريعي پنهنجن اڳوڻن رانديگرن کي خراج تحسين پيش ڪرڻ جو هي انداز تعريف جوڳو آهي.

يورپ ۾ ڪورونا تي ضابطي بعدفٽبال ليگ شروع ڪرڻ جو فيصلو
هيل تائين ملڪ ۾ سموريون دڪانون کولي سگهجن ٿيون، ماڻهو عوام هنڌن ۽ ٻار اسڪول وڃي سگهن ٿا

برلن(اسپورٽس نيوز) جرمن چانسلر سموري ملڪ ۾ ڪاروبار، اسڪول ۽ عوامي مرڪز کولڻ جوا علان ڪيو آهي. پرڏيهي خابرو اداري موجب انجيلا مرڪل چيو آهي ته هيل تائين ملڪ ۾ سموريون دڪانون کولي سگهجن ٿيون، ماڻهو عوام هنڌن ۽ ٻار اسڪول وڃي سگهن ٿا، جڏهن ته فٽبال ليگ هلندڙ مهيني شروع ٿيندي. رپورٽ موجب جرمني ۾ يورپ جي سڀ کان وڏي فٽبال ليگ هلندڙ مهيني جي آخر ۾ ٻيهر شروع ٿي ويندي. ٻئي پاسي اٽلي ۾ 30 هزار فوتگين ۾ 2 مهينن جي سخت لاڪ ڊائون بعد مرحليوار نرمي شروع ٿي وئي، اسپين ۾ به پبلڪ ٽرانسپورٽ شروع ٿي وئي آهي. چين ۾ حالتون معمول تي اچي ويون آهن، جتي اسڪول کلي ويا آهن، دنيا جي مختلف ملڪن ۾ راندين جون سرگرميون شروع ٿي رهيون آهن. واضح رهي ته ڪورونا وائرس جي ڪري سموري دنيا ۾ 2 مهينن کان وڌيڪ عرصي تائين راندين جون سرگرميون معطل رهيون آهن.

گگلي ماسٽر عبدالقادر ۽ ثقلين مشتاق جو ڊريم اسپن جوڙو

لاهور(اسپورٽس نيوز) گگلي ماسٽر مرحوم عبدالقادر ۽ دوسرا جي خالق ثقلين مشتاق جي جوڙي پاڪستان ٽيسٽ ڪرڪيٽ جي بهترين اسپن جوڙي قرار ڏني پئي وڃي.پاڪستان ڪرڪيٽ بورڊ طرفان سوشل ميڊيا تي جاري ڊريم ٽيسٽ پيئرز مهم ۾ جوڙيون ٺاهڻ جو سلسلو جاري آهي. سوشل ميڊيا تي متحرڪ 9 لک رانديگر، مداحن ۽ ڪرڪيٽ جي پنڊتن جادوگر اسپنر گگلي ماسٽر مرحوم عبدالقادر ۽ دوسرا جي خالق ثقلين مشتاق جي اسپن جوڙي کي پنهنجي پسنديده جوڙي قرار ڏنو آهي.مرحوم عبدالقادر ۽ ثقلين مشتاق پنهنجي ٽيسٽ ڪيريئر ۾ بالترتيب 236 ۽ 208 وڪيٽون حاصل ڪيون هيون. ٻنهي رانديگرن تي ٻڌل تصوراتي جوڙي شاندار ليگ ۽ آف اسپن ڪامبينيشن جي بنياد تي مشهور ٿي. ان دوران اڳوڻي ڪپتان راشد لطيف  ۽ اڳوڻي ٽيسٽ ڪرڪيٽر عمران نذير جي چونڊ ڪيل مشتاق احمد ۽ ثقلين مشتاق تي ٻڌل جوڙي مشهوري ۾ ٻئين نمبر تي رهي.

گليڊي ايٽرز کي ٻيو ڌچڪو: نسيم شاهه انجري جو شڪار
ڪوئيٽا ٽيم عمر اڪمل جي ٻاهر ٿيڻ کانپوءِ نسيم شاهه کان به محروم ٿي پئجي سگهي ٿي

ڪراچي(اسپورٽس نيوز) ڪوئيٽا گليڊي ايٽرز کي هڪ ٻيو ڌچڪو لڳو آهي، فاسٽ بالر نسيم شاهه انجري جو شڪار ٿي ويو آهي، جنهن جي پي ايس ايل مان ٻاهر ٿيڻ جو خدشو ظاهر ڪيو پيو وڃي. عمر اڪمل جي ٻاهر ٿيڻ کانپوءِ هاڻي دفاعي چيمپئن کي نسيم شاهه کان به محروم ٿيڻو پئجي سگهجي ٿو. 2 ڏينهن اڳ نسيم شاهه زلمي خلاف ميچ دوران پير جي ڀيڏي ۾ ڌڪ لڳڻ سبب انجري جو شڪار ٿي ويو، جنهن بعد کيس آرام ڏنو ويو هو. ڪوئيٽا گليڊي ايٽرز جي ترجمان جو چوڻ آهي ته نسيم شاهه جي فٽنيس ۾ بهتري اچي رهي آهي ۽ ضرورت پوڻ تي اسڪين به ڪراو ويندو. اهڙي صورتحال ۾ فاسٽ بالر جي پي ايس ايل ميچز کيڏڻ جا امڪان گهٽ آهن، ڇاڪاڻ ته کيس آرام جي ضرورت آهي، فاشت بالر کي مڪمل فٽ ٿيڻ لاءِ گهٽ ۾ گهٽ هفتو لڳي ويندو.

عابد علي پاران ڪاميابين جو سفر جاري رکڻ جو عزم

ڪراچي (اسپورٽس نيوز) عابد علي عالمي ڪرڪيٽ ۾ ڪاميابين جو سفر جاري رکڻ لاءِ پراميد آهي. ڪورونا سبب گهر تائين محدود اوپنر آسٽريليا خلاف ون ڊي ڊيبيو تي سينچري جون يادون تازيون ڪيون. نجي خابرو ويب سائيٽ موجب هن تازي انٽرويو ۾ چيو آهي ته ون ڊي ڊيبيو جي سالگرهه تي آسٽريليا خلاف سينچري جون يادون تازيون ٿي ويون آهن. ان کانپوءِ ٽيسٽ ڪرڪيٽ ۾ به الله عزت ڏني. ڪاميابين جو سفر جاري رکندس.

عمر اڪمل پاران نوٽيس آف چارج چيلينج نه ڪرڻ جو فيصلو

ڪراچي (اسپورٽس نيوز) پاڪستاني ڪرڪيٽر عمر اڪمل طرفان اينٽي ڪرپشن ڪوڊ جي ڀڃڪڙي تي مليل نوٽيس آف چارج کي چيلينج نه ڪرڻ جو فيصلو ڪيو ويو آهي. ذريعن موجب عمر اڪمل کي اينٽي ڪرپشن ڪوڊ جي ڀڃڪڙي تي گهٽ ۾ گهٽ سزا ٿي سگهي ٿي.

ٿرڊ امپائر کان مدد: پاڪستاني ڪپتان سڀني کان وڌيڪ ڪامياب

ڪراچي (اسپورٽس نيوز) ڊي آر ايس سسٽم رانديگر کي موقعو ڏيندو آهي ته هو فيلڊ امپائر جي فيصلي تي نظرثاني جي اپيل ڪري سگهي. 1992ع کان صرف  فيلڊ امپائرز ئي ٿرڊ امپائر جي مدد وٺي سگهي ٿو پر 2008ع کان ٽيسٽ ميچ ۾ رانديگر کي نظرثاني اپيل جي سهوليت فراهم ڪرڻ لاءِ ڊي آر ايس سسٽم متعارف ڪرائي وئي هئي. هڪ ڏينهن واري ميچ لاءِ 2011ع ۽ ٽي ٽوئنٽي لاءِ 2017ع ۾ ڊي آر ايس سسٽم متعارف ڪرايو ويو هو جنهن کي نظر ۾ رکندي سهوليت ڏني وئي آهي ته امپائر جي فيصلن تي ريويو جي اپيل ڪري سگهن. جڏهن ته پاڪستان جي قومي ڪرڪيٽ ٽيم هينئر تائين ڊي آر ايس جو سڀني کان وڌيڪ فائدو ورتو آهي ۽ فيلڊ ۾ موجود امپائرز جي فيصلن کي غلط ثابت ڪيو. قومي ڪرڪيٽ ٽيم 104 ريويوز ورتا جن مان 38 ڪامياب ٿيا ۽ اهو تناسب 34.6 سيڪڙو بڻجي ٿو. ٻئين نمبر تي انگلينڊ جنهن 176 ريويو ورتا جن مان 54 صحيح ثابت ٿيا. ۽ اهو تناسب 32.4 سيڪڙو بڻجي ٿو.

گرائونڊ اسٽاف هيرو آهي، پي سي بي کين فوري طور بونس ڏئي: وقار يونس

لاهور(اسپورٽس نيوز) قومي ٽيم جي بالنگ ڪوچ وقار يونس پي سي بي کان گرائونڊ اسٽاف کي بونس ڏيڻ جو مطالبو ڪيو آهي. هن چيو ته برسات کانپوءِ اسٽاف گرائونڊ کي ميچ جي قابل بڻائي ٿو، پنڊي ۽ لاهور جو گرائونڊ اسٽاف اصل ۾ هيرو آهي، کين فوري طور بونس ڏيڻ جو اعلان ڪيو وڃي.

عامر خان پاران پاڪستان کي 4 ڪروڙ امداد ڏيڻ جو اعلان
ماڻهن جون حياتيون بچائڻ لاءِ ڪردار ادا ڪرڻ چاهيان ٿو: باڪسر

ڪراچي (اسپورٽس نيوز) پاڪستان ڄائي برطانوي باڪسر عامر خان پاڪستان کي ڪورونا وائرس خلاف جنگ وڙهڻ جي لاءِ 4 ڪروڙ  رپيا ڏيڻ جو اعلان ڪيو آهي. ان کان اڳ باڪسر عامر خان پنهنجي اسلام آباد باڪسنگ اڪيڊمي  پاڪستان جي حڪومت کي ڏيڻ جو اعلان به ڪيو هو ۽ چيو هو ته ماڻهن جون زندگيون  بچائڻ جي لاءِ مان پنهنجو ڪردار ادا  ڪرڻ چاهيان ٿو. نه رڳو پاڪستان پر برطانيا ۾ به باڪسر عامر خان اين ايڇ ايس اسپتال کي ڪورونا وائرس سبب متاثرن جي لاءِ پنهنجي 4 ماڙ عمارت ۾ اسپتال ٺاهڻ جي آڇ ڪئي هئي. نجي خابرو ويب سائيٽ موجب ان حوالي سان  باڪسر عامر خان چيو هو ته مان چاهيان ٿو ته هن مشڪل وقت ۾ عوام جي لاءِ اسپتالن ۾ بسترو ملڻ ڪيترو مشڪل آهي ان لاءِ مان پنهنجي 60 هزار اسڪوائر فوٽ 4 ماڙ عمارت ڪورونا متاثرين کي ڏيڻ جي لاءِ تيار آهيان. ياد رهي ته مشهور شخصيتن طرفان ڪورونا وائرس جي وبا کي منهن ڏيڻ لاءِ پنهنجي وس آهر مدد ڪئي پئي وڃي.  جڏهن ته شوبز انڊسٽري سان لاڳاپيل شخصيتن سميت قومي رانديگرن طرفان به لاڪ ڊائون سبب غريب ماڻهن جي لاءِ راشن ورهائڻ جو سلسلو به جاري آهي.

زال جي ميچ ڏسڻي آهي؟، آسٽريلوي بالر ميچ اڌ ۾ ڇڏي ڏيهه واپس
مچل اسٽارڪ زال ايلسا هيلي جي ميچ ڏسڻ لاءِ ڏکڻ آفريڪن ٽور اڌ ۾ ڇڏي ڏنو

جوهانسبرگ(اسپورٽس نيوز) آسٽريلوي فاسٽ بالر مچل اسٽارڪ کي گهر واري جي ٽي ٽوئنٽي ورلڊ ڪپ فائنل ميچ ڏسڻ لاءِ ڏکڻ آفريڪي ٽور اڌ ۾ ڇڏڻ جي اجازت ملي وئي. ان ڏس ۾ آسٽريلوي فاسٽ بالر مچل اسٽارڪ زال ايلسا هيلي جي ميچ ڏسڻ لاءِ ڏيهه واپس وڃڻ جي اجازت گهري، جيڪا کيس ملي وئي آهي. وومين ٽي ٽوئنٽي ورلڊ ڪپ جو فائنل آچر تي آسٽريليا ۾ هوم ٽيم ۽ ڀارت وچ ۾ کيڏيو ويندو، مچل اسٽارڪ جي زال ايلسا هيلي فائنل ٽيم جو حصو آهي، مچل ڏکڻ آفريڪا جي دوري تي هو هن ٽئين ون ڊي کيڏڻ کان معذرت ڪئي. هن ٽيم مينجمينٽ آڏو موقف اختيار ڪيو ته مونکي پنهنجي زال جي سپورٽ ڪرڻ لاءِ ملڪ وڃڻو آهي.

ڏکڻ آفريڪا جي اڳوڻي آل رائونڊر ڪيلس اڌ ڏاڙهي ۽ شهپر ڪوڙائي ڇڏيا

ڪراچي(اسپورٽس ڊيسڪ) ڏکڻ آفريڪا جي اڳوڻي اسٽار آل رائونڊر جيڪس ڪيلس اڌ ڏاڙهي ۽ شهپر ڪوڙائي سڀني کي حيران ڪري ڇڏيو. ڏکڻ آفريڪا جي اڳوڻي ڪرڪيٽر اڌ ڏاڙهي ۽ شهپر ڪوڙي تصوير سوشل ميڊيا تي شيئر ڪئي ته نئون بحث ڇڙي ويو. ڪيلس ٽوئٽر تي ڪيپشن ۾ لکيو ته ڪجهه ڏينهن دلچسپ هوندا ۽ اهو سڀ گينڊي جي نسل جي تحفظ ۽ گالف جي بهتري لاءِ ڪيو آهي. واضح رهي ته جيڪس جانورن لاءِ مهم شروع ڪئي آهي.

ٺارو شاهه ۾ ڪرڪيٽ ٽورنامينٽ ۾ دلچسپ مقابلا

ٺاروشاھه(ن پ ا)ٺارو شاهه ڪيمپس هاءِ اسڪول ۾ ڪرڪيٽ ٽورنامينٽ جاري، ڪالهه هڪ وڌيڪ ميچ جو فيصلو، ان ڏس ۾ ڇهين کان ڏهين درجي جي شاگردن جي ٽيمن ۾ مقابلا جاري آهن. نائين بي ڪلاس ٽاس کٽي پهريان کيڏندي 10 اوورن ۾ 156 رنز ٺاهيون، جواب ۾ نائين اي ڪلاس مقرر اوورن ۾ 150 رنز ٺاهي سگهي. فاتح ٽيم کي استادن پاران داد ڏنو ويو.

نوشهرو فيروز ۾ سني ڪلب ڪرڪيٽ ميچ کٽي ورتي
ڀٽائي ڪلب پهريان کيڏندي 25اوورن ۾6وڪيٽن جي نقصان تي187رنزاسڪورڪيون

نوشھروفيروز(رپورٽر) نوشهرو فيروز ۾ ڪرڪيٽ ٽورنامينٽ جي ٻئي رائونڊ جي اهم ميچ سني ڪلب کٽي ورتي. ان ڏس ۾ مرحوم راشد حنيف ڪرڪيٽ ٽورنامينٽ جي ٻئي رائونڊ ۾ سني ڪلب ۽ ڀٽائي ڪلب جي ٽيمن ميچ کيڏي. ڀٽائي ڪلب پهريان کيڏندي 25اوورن ۾ 6 وڪيٽن جي نقصان تي 187 رنز ٺاهيون. ذاڪر اڄڻ 51، شھزاد 32 ۽ ڪاشف 25 رنز ٺاهي نمايان رهيا. سني ڪلب جي معظم لغاري 3، سيف الله ۽ اختر شاھ 2-2 وڪيٽون ورتيون. جواب ۾ سني ڪلب 24 اوورن ۾ 7 وڪيٽن جي نقصان تي حدف حاصل ڪيو.افتخار 57 جي شاندار اننگز کيڏي. ڀٽائي ڪلب جي ڪاشف 4، وسيم ملاح ۽ سھيل پنھور 1-1 وڪيٽ ورتي، افتخار سومرو کي مين آف دي ميچ قرار ڏنو ويو.