تازا ترين
  • *کڏڙو بس اسٽاپ تي ٻن موٽر سائيڪلن ۾ ٽڪر، 3 ڄڻا سخت زخمي *محمدرمضان خاصخيلي،لال محمد بروهي ۽ علي محمد بروهي ڳڻتي جوڳي حالت ۾ اسپتال منتقل*
  • *خانواهڻ ويجهو ڦر مزاحمت تي جوابدارن گوليون هڻي اهلڪار کي زخمي ڪري ڇڏيو *پير مسافر وٽ 3هٿياربندن اهلڪار سڪندر ڪلھوڙو کان موٽرسائيڪل ڦر ڪرڻ جي ڪوشش ڪئي *مزاحمت تي جوابدارن اهلڪار کي گوليون هڻي زخمي ڪري ڇڏيو، اسپتال منتقل*
  • *ملڪ ۾ کاڌي پيتي جي شين جي اگهن ۾ واڌ بابت شماريات کاتي جا انگ اکر جاري *گوشت3.9 ۽ کنڊ3.8 سيڪڙو مهانگي ٿي: شماريات کاتو *جولائي ۾ سالياني بنياد تي شهري علائقن ۾ ٽماٽر سئو سيڪڙو مهانگو ٿيو:شماريات کاتو *پٽاٽا63 سيڪڙو ۽ دال مڱ 46.25سيڪڙو مهانگي ٿي: شماريات کاتو *ڪڻڪ28.52۽ اٽو 18.52 سيڪڙو مهانگو ٿيو: شماريات کاتو *
  • *لاڙڪاڻو: مبينا طور اغوا ٿيل نينگري جي بازيابي لاءِ وارثن جو پاڪ ڪتاب کڻي احتجاج *27جولائي تي جتوئي برادري جا هٿياربند گهر گهڙي نياڻي ماجده کي اغوا ڪري ويا: وارثن جو الزام*
  • *فريدآباد: ڳوٺ عبدالله شاھه گودڙيو ۾ ڪرنٽ لڳڻ سبب 3 ٻارڙن جي ماءُ فوت *گهر اندر پکي مان ڪرنٽ لڳڻ سبب 26 ورهين جي گمبُل زال رب رکيو چانڊيو فوت*
  • *صدرجي ڀٽيون ويجهو زميندار تي حملو، 2 ڄڻا زخمي، هڪ ڄڻو مبينا اغوا *هٿياربندن جي حملي ۾ زميندار ولي شاهه ۽ ربنواز ناريجو زخمي، امير ناريجو مبينا اغوا*
  • *ڪراچي: جوهر چورنگي ويجهو جي ڊي سي فائونڊيشن وٽان نامعلوم پيرسن جو لاش هٿ *لاش ايڌي ايمبولينس ذريعي جناح اسپتال منتقل، سڃاڻپ نه ٿي سگهي*
  • *سيوھڻ: درگاھه قلندر کي کولرائڻ لاءِ دڪاندارن ۽ پورهيتن جو27هين ڏينهن به احتجاج *درگاھه قلندر کي ايس او پي تحت کولي بک ۽ بدحالي کان بچايو وڃي: دڪاندار ۽ پورهيت *
اسپاٽ فڪسنگ ڪيس: عمر اڪمل کي اپيل تي رليف
رٽائرڊ جسٽس فقير محمد کوکر لاهور ۾ نيشنل هاءِ پرفارمنس سينٽر ۾ ڪرڪيٽر عمر اڪمل جي سزا خلاف اپيل تي ٻڌڻي ڪئي، پي سي بي ۽ عمر اڪمل جي وڪيلن دليل ڏنا

لاهور (اسپورٽس نيوز) پاڪستان ڪرڪيٽ بورڊ (پي سي بي) جي انڊپينڊنٽ ايڊجوڊيڪيٽر جج ڪرڪيٽر عمر اڪمل جي حوالي سان ضابطن واري ڪيس بابت فيصلو ٻڌائيندي مٿس 3 سالن جي پابندي کي گهٽ ڪري 18 مهينا ڪري ڇڏيو. فيصلو ٻڌائيندڙ رٽائرڊ جسٽس فقير محمد کوکر لاهور ۾ نيشنل هاءِ پرفارمنس سينٽر ۾ ٻڌڻي ڪئي. 20فيبروري تي پاڪستان سپر ليگ جي شروعات کان اڳ شڪي ماڻهن سان رابطن جي ٻن واقعن ۾ بورڊ کي رپورٽ نه ڪرڻ تي هلندڙ سال پي سي بي جي ضابطن واري ڪميٽي طرفان 3 سال پابندي خلاف عمر اڪمل اپيل داخل ڪرائي هئي. پي سي بي جي اينٽي ڪرپشن يونٽ جي ضابطن تحت سڀني رانديگرن کي اهڙو اطلاع ڏيڻ ضروري آهي.عمر اڪمل ٻنهي واقعن ۾ ڄاڻايل ضابطي جي آرٽيڪل 2.4.4 جي ڀڃڪڙي ڪئي.ڪرڪيٽر جي وڪيل طيب رضوي جو چوڻ هو ته انڊپينڊنٽ ايڊجوڊيڪيٽر جي فيصلي تي شڪر ادا ڪيون ٿا ته هن اسان کي رليف ڏنو، اها سزا وڌيڪ گهٽ ٿي سگهي ٿي.هن چيو ته اسان جهڙي فيصلي جو سوچي رهيا هئاسين، اهڙو فيصلو ناهي، ٻين ڪيسن ۾ ڪجهه رانديگرن کي سزا گهٽ ملي هئي.ان موقعي تي عمر اڪمل صحافين سان ڳالهائيندي چيو ته جج صاحب جو ٿورائتو آهيان، ڪوشش ڪنداسين ته سزا وڌيڪ گهٽ ٿئي.هن وڌيڪ چيو ته مان فيصلي مان مطمئن ناهيان، وڪيلن ۽ گهر ڀاتين سان صلاح مشورو ڪري اڳتي لاءِ حڪمت عملي جو فيصلو ڪندس.

آءِ سي سي نئين ٽيسٽ رينڪنگ جاري ڪري ڇڏي
بالرز ۾ آسٽريليا جي پيٽ ڪمينز جي پهرين پوزيشن برقرار، بيٽسمينن ۾ آسٽريليا جو اسٽيو اسمٿ نمبر ون قرار

لنڊن(اسپورٽس نيوز)انٽرنيشنل ڪرڪيٽ ڪائونسل(آءِ سي سي) نئين ٽيسٽ رينڪنگ جاري ڪري ڇڏي. آءِ سي سي پاران جاري ڪيل نئين ٽيسٽ رينڪنگ ۾ بالرز ۾ اسٽريليا جي پيٽ ڪمينز جي پهرين پوزيشن برقرار آهي، جڏهن ته نيوزيلينڊ جو نيل ويگنر ٻئي نمبر تي اچي ويو آهي. نئين رينڪنگ موجب بالرز ۾ انگلينڊ جي اسٽورٽ براڊ ٽئين نمبر تي اچي ويو آهي. بيٽسمينن ۾ آسٽريليا جو اسٽيو اسمٿ پهرين، ڀارتي ڪپتان ويرات ڪوهلي ٻئي ۽ آسٽريليا جي ليبوشين ٽئين نمبر تي آهي. ٽيسٽ رينڪنگ موجب آل رائونڊرز ۾ انگلينڊ جو بين اسٽوڪس پهرين نمبر تي اچي ويو آهي، ويسٽ انڊيز جو جيسن هولڊر ٻئي نمبر تي ڌاڪو ڄمائي ورتو آهي. آل رائونڊرز ۾ ڀارت جي ريوندارا جديجا جو ٽيون نمبر آهي. پاڪستان ڪرڪيٽ ٽيم جا رانديگر بالنگ، آل رائونڊرز جي ڪيٽيگري ۾ گهڻو پوئتي آهن

انگلينڊ خلاف ٽيسٽ دنگل: قومي ٽيم جي روايتي نيٽس بدران سيناريو بيسڊ ٽريننگ
ڪرڪيٽرن روايتي نيٽس بدران سيناريو بيسڊ ٽريننگ ڪئي، هيڊ ڪوچ مصباح الحق کين مختلف حدف ڏنا

ڊربي(اسپورٽس نيوز) انگلينڊ خلاف سيريز لاءِ پاڪستان ڪرڪيٽ ٽيم ڀرپور انداز ۾ تياريون ڪري رهي آهي، ڊربي ۾ هڪ ڏينهن آرام کانپوءِ پاڪستاني ڪرڪيٽرن هڪ ڀيرو ٻيهر ميدان جو رخ ڪيو آهي ۽ ٽارگيٽ سيناريو پريڪٽس ڪئي آهي. 5 آگسٽ کان شروع ٿيندڙ ٽيسٽ سيريز لاءِ پاڪستان ڪرڪيٽ ٽيم ڊربي ۾ ٻي 4 ڏينهن واري ميچ بعد هڪ ڏينهن آرام ڪيو ۽ ڪالهه پريڪٽس شروع ڪئي. پاڪستاني ڪرڪيٽرن روايتي نيٽس بدران سيناريو بيسڊ ٽريننگ ڪئي، جنهن ۾ هيڊ ڪوچ مصباح الحق بيٽسمينن ۽ بالرز کي سيشن جي بنياد تي مختلف حدف ڏنا. پاڪستان ڪرڪيٽ ٽيم وڌيڪ 2 ڏينهن ڊربي ۾ پريڪٽس ڪندي، جنهن بعد پهرين آگسٽ تي ڪرڪيٽر مانچسٽر رواني ٿيندي.

عمر اڪمل سان ڪنهن رابطو ڪيو، فيصلي ۾ نالو ڇو شامل ناهي؟
پي سي بي اهو ناهي ٻڌايو ته عمر اڪمل سان ڪنهن رابطو ڪيو، بڪيز ڪير هئا؟

لاهور: ڪرڪيٽر عمر اڪمل ڪيس ۾ پاڪستان ڪرڪيٽ بورڊ(پي سي بي) جي عمر اڪمل سان فڪسنگ لاءِ رابطو ڪندڙن خلاف جاچ جاري آهي، پر پي سي بي اهو ناهي ٻڌايو ته عمر اڪمل سان ڪنهن رابطو ڪيو، بڪيز ڪير هئا؟. بورڊ جو چوڻ هو ته پي سي بي قانون لاڳو ڪندڙ ادارن ۽ جاچ ادارن جي سهڪار سان جاچ ڪري رهيو آهي، ان حوالي سان عمر اڪمل کي آڇ ڪندڙن بابت ڄاڻ به ڏني وئي آهي. عمر اڪمل کي 2 مختلف واقعن ۾ 2 ماڻهن لاهور ۾ ميچ فڪسنگ جي آڇ ڪئي هئي، جن جا تفصيل به پڌرا ناهن ٿيا.

انگلينڊ پهتل محمد عامر جي ڪورونا وائرس جي ٻيهر ٽيسٽ

لنڊن(اسپورٽس نيوز) قومي ڪرڪيٽ ٽيم جي فاسٽ بالر محمد عامر جي ٻيهر ڪورونا وائرس جي ٽيسٽ ڪئي وئي. محمد عامر ڪورونا وائرس جي رپورٽ نيگيٽو اچڻ تي ٽيم جوائن ڪري سگهندو، جڏهن ته رپورٽ اڄ شام تائين پڌري ٿيڻ جوا مڪان آهي. واضح رهي ته محمد عامر جي پهرين ڪورونا وائرس ٽيسٽ نيگيٽو آئي هئي ۽ محمد عامر انگلينڊ پهچڻ بعد 5 ڏينهن کان آئسوليٽ ٿيل آهي.

ڳاڙهي موري ۾ ڪرڪيٽ جو مها دنگل: بلوچ اسٽار فائنل کٽي ورتو
ايونٽ ۾ 16 ٽيمن حصو ورتو، رانديگرن شاندار ڪارڪردگي جو مظاهرو ڪيو

خيرپور(اسپورٽس نيوز) خيرپور ضلعي جي علائقي ڳاڙهي موري ۾ اميد علي شاھ عرف ڏاڏا شاھ ڪرڪيٽ ٽورنامينٽ ڪرايو ويو، جنھن ۾ خيرپور ضلعي جي 16 ٽيمن حصو ورتو. ايونٽ ۾ مڙني ٽيمن جي رانديگرن شاندار ڪارڪردگي جو مظاهرو ڪيو. ڳاڙھي موري اليون ڪرڪيٽ ڪلب ۽ پريالوء جي بلوچ اسٽار ڪلب فائنل ۾ جاءِ ٺاهڻ ۾ ڪامياب ويون. بلوچ اسٽار 10 اوورن ۾ 93 رنز ٺاهيون، مخالف ٽيم حدف حاصل ڪرڻ ۾ ناڪام وئي. ڪاشف ڪلهوڙي کي مين آف دي ٽورنامينٽ ۽ نديم سومرو کي مين آف دي ميچ جي اعزاز سان نوازيو ويو. ڪامياب ٽيم جي ڪپتان نديم سومري ونر ۽ عالمگير بلوچ رنر اپ ٽرافيون وصول ڪيون. ڪامياب ٽيم جي رانديگرن کي ايم اين اي جاويد شاهه جيلاني ۽ ٻين انعامن ڏيڻ سان گڏ سندن حوصلا افزائي ڪندي سنڌ سرڪار کان اسٽيڊيم جي گهر ڪئي.

پي سي بي ۾ تبديليون گهڻيون ٿي چڪيون، هاڻ ڪجهه ڪري ڏيکاريو: سعيد اجمل

لاهور(اسپورٽس نيوز) اڳوڻي ٽيسٽ رانديگر سعيد اجمل چيو آهي ته پي سي بي ۾ تبديليون گهڻيون ٿي چڪيون آهن هاڻ ڪجهه ڪري ڏيکارڻ جو وقت آهي. وڊيو لنڪ تي  ڳالهيون ڪندي اڳوڻي آف اسپنر جو چوڻ هو ته ماضي ۾ به ڊوميسٽڪ ڪرڪيٽ جي بهتري جي لاءِ تمام گهڻا دعويٰ ڪيا ويا. هاڻ نيشنل هاءِ پرفارمنس سينٽر ۾ تبديلين جا بهتر نتيجا سامهون  اچڻ گهرجن ماضي ۾ به تبديليون ڪيون ويون پر مثبت نتيجا نه اچي سگهيا. سعيد اجمل چيو ته نديم خان، ثقلين مشتاق ۽ گرانٽ بريڊ برن تجزيه ڪار آهن.ڊوميسٽڪ ڪرڪيٽ جي اهل ٻه سئو رانديگرن کي به وقفي وقفي سان پولز ۾ ورهائي خاص ڪيمپس لڳائڻ جو اهتمام ڪرڻ گهرجي . ان جي فٽنس ۽ اسڪل ۾ بهتري تي ڪم ڪريو. سعيد اجمل سليڪٽرز تي زور ڏنو ته فرسٽ اليون سان گڏ سيڪنڊ اليون ۾ ڪارڪردگي ڏيکاريندڙ رانديگرن تي به ڌيان ڏيڻو پوندو. ڊوميسٽڪ رانديگرن جي معاوضن ۾ واڌ سان رانديگرن جا مسلا حل ڪرڻ ۾ مدد ملندي. پي سي بي کي ڊوميسٽڪ ڪرڪيٽ ۾ ادارن جو ڪردار بحال ڪرڻ گهرجي. ادارن کي ڪنهن هڪ فارميٽ ۾ ئي کيڏڻ جو موقعو ڏيو انهن رانديگرن جو روزگار بحال ٿيندو.

زينب عباس ايشيا، يوڪي ۽ يورپي يونين جي 100 متاثر ڪندڙ شخصيتن ۾ شامل

ڪراچي(اسپورٽس نيوز) اسپورٽس نيوز پريزنٽر زينب عباس ايشيا، يوڪي ۽ يورپي يونين جي 100 متاثر ڪندڙ شخصيتن جي فهرست ۾ شامل ٿي وئي آهي. فوٽو ۽ وڊيو شيئرنگ ايپ انسٽاگرام تي زينب عباس اها لسٽ به پوسٽ ڪئي، جنهن ۾ ايشيا، يوڪي ۽ يورپي يونين جي 100 شخصيتن جا نالا لکيل هئا.

مقصودو رند ۾ جشن آزادي ڪرڪيٽ ميچ: رند اليون ڪامياب

مقصودو رند( ن پ ا) مقصودو رند ۾ جشن آزادي ڪرڪيٽ ٽورنامينٽ جي اهم ميچ ۾ ولي محمد رند اليون ڪاميابي ماڻي ورتي. راحب رند جي نگراني ۾ جاري جشن آزادي ڪرڪيٽ ٽورنامينٽ 2020 جي 6 پري ڪواٽر مئچ ۾ ولي محمد رند ۽ محبت رند اليون جون ٽيمون آمهون سامهون ٿيون. ولي محمد رند اليون ٽاس کٽي پهريان بيٽنگ ڪندي مقرر 15 اوورن ۾ اشفاق حيدر رند جي 53 رنسن جي مدد سان 192 رنسن جو ٽارگيٽ ڏنو. جواب ۾ محبت رند جي ٽيم نديم حسين جي 43 رنسن جي مدد سان 139 رنسون ٺاهي سگهي. ولي محمد رند اليون 52 رنسن تان ڪاميابي ماڻي.

قومي ڪرڪيٽر ڪائنات  امتياز همسفر ڳولي ورتو

ڪراچي (اسپورٽس نيوز) پاڪستان جي وومين ڪرڪيٽ ٽيم جي ميڊيم فاسٽ بالر ڪائنات امتياز لاڪ ڊائون ۾ خاموشي سان مڱڻي ڪري ڇڏي.ڪائنات پنهنجي مڱڻي جو اطلاع سوشل ميڊيا ذريعي ڏنو.سماجي رابطن جي ويب سائيٽ ٽوئيٽر تي مڱڻي جي منڊي پهريندي هڪ سهڻي تصوير شيئر ڪئي.آل رائونڊر راديگرياڻي  پنهنجي ٽوئيٽ ۾ لکيو ته نيٺ آئون “ها” ڪري ڇڏي، منهنجي مڱڻي ٿي وئي.هن ٻڌايو ته مڱڻي جي تقريب گذريل ڏينهن رٿي وئي.مداحن ۽ ڪرڪيٽ شوقينن جي وڏي انگ طرفان ڪائنات اامتياز لاءِ مبارڪباد ۽ ۽ نيڪ خواهسن تي ٻڌل پيغام شيئر ڪيا پيا وڃن.

بخشاپور ۾ ڪرڪيٽ ٽورنامينٽ پرنس سنڌڙي اليون جي نانءُ
بوم بوم اليون جي ڪپتان رفيق احمد ٽاس کٽي پهريان بيٽنگ جو فيصلو ڪيو

بخشاپور(ن پ ا)بخشاپور ۾ شاهه علي ڊومڪي ڪرڪيٽ ٽورنامينٽ ۾ پرنس سنڌڙي اليون بوم بوم اليون کي شڪست ڏئي ڇڏي. بوم بوم اليون جي ڪپتان رفيق احمد ٽاس کٽي پهريان بيٽنگ جو فيصلو ڪيو ۽ مقرر 10اوورن ۾ 94 رنز ٺاهي سگهي،ثناء الله سومرو 25 رنس ۽ اظھر علي ڊومڪي 21 رنسن جي اننگز کيڏي.جواب ۾ پرنس سنڌڙي اليون جي اوپنر آصف علي 20بالن تي 33 اسڪور ۽ ونود ڪريوال 12 بالن تي 21 رنسن سان 7 اوورن ۾ حدف مڪمل ڪري فائنل کٽي ورتو.آصف علي ڀٽو کي ٽورنامينٽ جي بھترين بيسٽمن جو ايوارڊ ڏنو ويو، فائنل ۾ بھترين بالنگ جو راهول ڪريوال کي انعام طور ٽرافي ڏني وئي.

پي سي بي جي اڳوڻن ڪرڪيٽرن کي ٻيهر ميدان ۾ اچڻ جي دعوت
اڳوڻي رانديگرن جي ڊوميسٽڪ سيزن 21-2020 ۾ شموليت تي سنجيدگي سان غور ڪري رهيا آهيون: پي سي بي

لاهور(اسپورٽس نيوز) پاڪستان ڪرڪيٽ بورڊ(پي سي بي) اڳوڻي ڪرڪيٽرن کي هڪ ڀيرو ٻيهر ميدانن ۾ اچڻ جي دعوت ڏئي ڇڏي آهي، ان سلسلي ۾ اڳوڻي رانديگرن کي ميچ آفيشلز سميت مختلف ڪردارن ۾ ڊوميسٽڪ سيزن 21-2020 ۾ شموليت تي سنجيدگي سان غور ڪيو پيو وڃي. ريٽائرڊ رانديگرن لاءِ ڊوميسٽڪ ڪرڪيٽ ۾ ميچ آفيشز جي ذميواريون نڀائڻ جي آڇ ڪئي وئي، ته جيئن کين عالمي سطح تي مهارت ڏيکارڻ جو موقعو ملي سگهي. في الحال انٽرنيشنل ڪريڪٽ ڪائونسل(آءِ سي سي) جي ايليٽ پينل جي ميچ آفيشلز ۾ عليم ڊار اڪيلو پاڪستاني آهي، جنهن کي عالمي سطح تي معتبر امپائر سمجهيو ويندو آهي. پاڪستان ڪرڪيٽ بورڊ پاران مقرر ڪيل معيار موجب اميدوار گهٽ ۾ گهٽ 50 فرسٽ ڪلاس ميچز کيڏي چڪو هجي ۽ ان جي عمر 40سالن کان گهٽ هجي. تازو ئي هاءِ پرفارمنس پرگرام ۾ پي سي بي اڳوڻي رانديگرن کي مختلف ڪوچنگ رولز سنڀالڻ جا طريقا سيکاريا هئا. واضح رهي ته اڳوڻا ڪرڪيٽر سدائين موقعو نه ملڻ جو ڏوراپو ڏيندا رهندا آهن، پهريون ڀيرو پي سي بي کين آڇ ڪئي اهي ته ڊوميسٽڪ ڪرڪيٽ ۾ ذميواريون نڀائي پنهنجو مستقبل ٺاهيو، ان حوالي سان اڳوڻن ڪرڪيٽرن پي سي بي سان رابطا به شروع ڪري ڇڏيا آهن.

سڳيون ۾ ملاکڙو، سنڌ ۽ پنجاب جي پهلوانن جي زور آزمائي

سڳيون(ن پ ا) سڳيون ڀرسان صوفي بزرگ سيد دائود شاھ عرف دادلي جهانيان جي عرس تي سنڌ جي ثقافتي راند ملهه جا مقابلا ڪرايا ويا، جنهن ۾ سنڌ ۽ پنجاب جي مشهور پهلوانن زور آزمائي ڪئي. ملاکڙ جي پهرين جوڙ ۾ گلاب علي چنا، حنيف راهو، محمد خان ڦل، محرم مجيداڻو ميدان تي لٿا، جن هڪٻئي کي جانٺا ۽ وارا هڻي شوقينن کان خوب داد وصول ڪيو. ٻئي جوڙ ۾ پهلوان عبدالجبار چنا، اعجاز چنا، اوشاق چنا دوبدو ٿيا، جڏهن ته ٽئين جوڙ ۾ پهلوان حاڪم چنا، الاهي بخش ڀٽي ۽ مشهور وڇون پهلوان ۽ ٻين پهلوانن جا پاڻ ۾ مقابلا ٿيا. ان موقعي تي ڪاميابي ماڻيندڙ پهلوانن کي انعامن سان نوازيو ويو.

سڳيون ۾ ڪرڪيٽ ٽورنامينٽ شروع:16 ٽيمون ميدان تي لٿل

سڳيون( رپورٽ: تسليم احمد) سڳيون لڳ پير گهرگهل شاهه ۾ پيرگهرگهل ڪرڪيٽ ٽورنامينٽ شروع ٿي ويو، جنهن 30 ميچون کيڏيون وينديون، 16ٽيمون آمهون سامهون ٿينديون. ڪالھه پهرين ميچ سڳيون جي الشھباز ٽيم ۽ خانواهڻ ٽيم ۾ کيڏي وئي. سڳيون الشھباز ڪرڪيٽ ٽيم ٽاس کٽي فيلڊنگ جو فيصلو ڪيو . خانواهڻ مقرر اوورن ۾ 5 وڪيٽن جي نقصان سان 109رنسون ٺاهيون، جنهن ۾ حميد ملاح 3 رانديگرن کي آئوٽ ڪيو. جواب ۾ سڳيون الشھباز ڪرڪيٽ ٽيم مقرر اوورن ۾ هڪ دلچسپ مقابلي بعد آخري اوور ۾ ميچ کٽي ورتي. محمد منهاج کي مين آف ميچ قرار ڏنو ويو.

نوابشاهه ۾ راندين جي ميلي جو ٻيو ڏهاڙو
فيسٽيول ۾ شهيد بينظيرآباد، نوشهروفيروز ۽ سانگهڙ جي اسڪول ۽ ڪاليجن جي شاگردياڻين ۾ راندين جا مقابلا ٿيا

نوابشاھه(رپورٽ: اياز ڏاهري) شهيد بينظيرآباد ڊويزنل ونٽر اسپورٽس فيسٽيول ۾ ٻئي ڏينهن تي به ڇوڪرين جي مختلف راندين جا شاندار مقابلا، ان ڏس ۾ ونٽر اسپورٽس فيسٽيول ۾ شهيد بينظيرآباد، نوشهروفيروز ۽ سانگهڙ جي اسڪول ۽ ڪاليجن جي شاگردياڻين ۾ بيڊمنٽن، ٽيبل ٽينس، ٽگ آف وار، 100 ميٽر ۽ 400 ميٽر رلي ڊوڙ، لانگ جمپنگ، ٿرو بال سميت ٻين راندين جا مقابلا ٿيا،100ميٽر ريس ۾ گرلز ڪاليج سانگهڙ جي زنيرا پهرين، ڊگري ڪاليج نوابشاھه جي عريبه ٻين ۽ ساڳئي ڪاليج جي شاگردياڻي ٽين پوزيشن حاصل ڪئي. 4100 ميٽر ريس ۾ سانگهڙ جي ٽيم پهرين،شهيد بينظيرآباد ٻي ۽ نوشهروفيروز جي ٽيم ٽئين پوزيشن حاصل ڪئي. جڏهن ته لانگ جمپ ۾ گرلز ڪاليج نوابشاھه جي ڪرن پهرين، ڊگري ڪاليج ٽنڊو آدم جي لائيبه ٻي ۽ ڊگري ڪاليج مورو جي رابعه ڀٽي ٽين پوزيشن حاصل ڪئي.ٽيبل ٽينس ۾ سانگهڙ جي ٽيم پهرين ۽ نوابشاھه ٻي پوزيشن حاصل ڪئي، جڏهن ته ٿرو بال ۾ ڊگري ڪاليج نوابشاھه جي ٽيم پهرين ۽ گرلز ڊگري ڪاليج شهدادپور جي ٽيم ٻي پوزيشن حاصل ڪئي. بيڊمنٽن جي سنگل ۽ ڊبل مقابلن ۾ شهدادپور پهرين ۽ نوابشاھ ٻي پوزيشن حاصل ڪئي. ٽگ آف وار (رسا ڪشي) جي مقابلن ۾ ٽنڊوآدم جي ٽيم پهرين ۽ نوابشاھه ٻي پوزيشن ماڻي. اهڙي ريت ٻين راندين جا پڻ دلچسپ مقابلا ٿيا.