تازا ترين
  • *حڪومت مخالف تحريڪ ۾ استعيفائن جو آپشن آخري هوندو، گرفتاريون معنيٰ نٿيون رکن: يوسف رضا گيلاني*
  • *نيب هٿان گرفتار شهباز شريف لاهور جي احتساب عدالت آڏو پيش*ليگي اڳواڻ ۽ وڏي تعداد ۾ ڪارڪن به عدالت پهچي ويا، پارٽي قيادت جي حمايت ۾ مظاهرو*
  • شهباز شريف جي گرفتاري بعد مخالف ڌر سرگرم: پاڪستان ڊيموڪريٽڪ موومينٽ جو اجلاس اڄ ٿيندو
نيشنل ٽي 20ڪپ 30 سيپٽمبر کان ملتان ۾ شروع ٿيندو
سينٽرل پنجاب ۽ سنڌ جون ٽيمون نيشنل ٽي ٽوئنٽي ڪپ جي تاريخ تبديل ڪرڻ جون منتظر

لاهور(اسپورٽس نيوز) نيشنل ٽي ٽوئنٽي ڪپ 30 سيپٽمبر تي ملتان ۾ شروع ٿيندو، تجريبيڪار رانديگرن تي ٻڌل سينٽلر پنجاب ۽ سنڌ جون ٽيمون ٽورنامينٽ ۾ بهترين ڪارڪردگي ڏيکارڻ لاءِ پرعزم آهن، ٻنهي ٽيمن گذريل سال فيصل آباد ۾ کيڏيل نيشنل ٽي ٽوئنٽي ڪپ جي ناڪ آئوٽ مرحلي ۾ رسائي حاصل ڪرڻ ۾ ناڪامي حاصل ڪئي هئي، جڏهن ته گذريل ايڊيشن ۾ ٻنهي ٽيمن وچ ۾ کيڏيل واحد ميچ سنڌ کٽي هئي، فاتح ٽيم 189 رنز جو حدف ميچ جي آخري بال تي حاصل ڪيو ويو هو. آئنده سالن ۾ آءِ سي سي جي ٻن وڏن ايونٽس جي ڪري پي سي بي نيشنل ٽي ٽوئنٽي ڪپ کي ڊبل ليگ جي بنياد تي ڪرائي رهيو آهي، ايونٽ جون سموريون ميچز پي ٽي وي اسپورٽس تي سڌي ريت نشر ڪيون وينديون. هلندڙ اينڊيشن ۾ ٻنهي ٽيمن پهرين 2 آڪٽوبر تي ملتان ڪرڪيٽ اسٽيڊيم ملتان ۽ پوءِ 10 آڪٽوبر تي پنڊي ڪرڪيٽ اسٽيڊيم پنڊي ۾ دوبدو ٿينديون، سينٽرل پنجاب جي مضبوط بيٽنگ لائين اپ جي قيادت بابر اعظم ڪندو. پاڪستان وائٽ بال ڪرڪيت ٽيم جي ڪپتان بابر اعظم نيشنل ٽي ٽوئنٽي ڪپ جي گذريل ايڊيشن ۾ سينچري ٺاهي هئي، هن ايونٽ ۾ ٻي سينچري ٺاهيندڙ بيٽسمين احمد شهزاد جو واسطو به پنجاب سان آهي. سنڌ ٽيم جي قيادت وڪيٽ ڪيپر بيٽسمين سرفراز احمد ڪري رهيو آهي، ٽي ٽوئنٽي ڪرڪيٽ جي عالمي رينڪنگ ۾ هڪ ڊگهو عرصو نمبر رهندڙ پاڪستان ڪريڪٽ ٽيم جو ڪپتان رهندڙ سرفراز احمد جو نائب سعود شڪيل آهي.

ڄامشورو ۾ملهه ملاکڙو، زور آزمائي لاءِ ملهه پهلوان پهچي ويا
قومي راند ملهه جو ٻن ڏينهن وارو ملاکڙو ، سنڌ، بلوچستان ۽ پنجاب جا پهرين

ڄام شورو (اسپورٽس نيوز) ڄام شورو ۾ سنڌ جي قومي راند ملهه جو ٻن ڏينهن وارو ملاکڙو شروع ٿي ويو آهي جنهن ۾ سنڌ، بلوچستان ۽ پنجاب جا پهرين، ٻئين ۽ ٽئين جوڙ جا ملهه پهلوان پهچي ويا آهن، ملاکڙي جو فيصلائتو مقابلو اڄ ٿيندو. جوڻيجا برادري جي معزز شخصيت رستم خان جوڻيجو ۽ جوڻيجا ويلفيئر آرگنائيزيشن جيمرڪزي صدر ڀاءُ برڪت خان جوڻيجو جي والد سخي الحاج محمد ابراهيم جوڻيجو جي ٻارهي جي موقعي تي ڪرايل ٻن ڏينهن واري ملاکڙي جي پهرين ڏينهن ئي پهرين جوڙ جي ملهه پهلوانن فدا حسين ملاح، غلام مصطفيٰ نارو، گل حسن چانڊيو، مختيار عالماڻي، عرفان ملاح، راهب ٽڳڙ، ممتاز زرداري.ٻئين جوڙ ۾ حضور بخش زرداري، آصف علي زرداري، بوسڪي پنجابي، ڪولر زرداري، مختيار پنهور، ٽئين جوڙ ۾ ٽيڊي شيدي، مور هوٿيپوٽو، حاجي لکمير زرداري، غلام نبي چانڊيو، آصف رند، تڳيل نوحاڻي ۽ ٻين ملهه مقابلي ۾ حصو ورتو.پهلوانن زور آزمائي ڪندي مخالف پهلوانن کي ملهون ڏسي هوڪرا ڪرائي ڇڏيا، ڪيترائي ملهه پهلوان جانٺن جي سٽ نه سهڻ ڪري پٽ پئجي ڏندڻجي ويا، اڄ ملهه ملاکڙي جا فيصلائتا مقابلا ٿيندا جنهن ۾ پهرين، ٻئين ۽ ٽئين جوڙ جي پهلوانن کي ميزبان رستم خان جوڻيجو ۽ برڪت علي جوڻيجو طرفان روڪ انعام ۽ اجرڪن جا تحفا ڏنا ويندا، جڏهن ته ملاکڙي ختم ٿيڻ کان پوء خيرات في سبيل اللّه جو اهتمام پڻ ڪيو ويو آھي.

اٽالين اوپن: لورينزو سونيگو ۽ ڊينيل ميدوديو کي شڪست

اٽلي(اسپورٽس نيوز) اٽالين اوپن ۾ فليڪس اوزيريا سم لورينزو سونيگو کي شڪست ڏئي ڇڏي، جڏهن ته ٽاپ سيڊ ڊينيل ميدوديو کي اوگو همبرٽ هٿان شڪست کائڻي پئي آهي.

بنگلاديش ڪرڪيٽ ٽيم جي سريلنڪا جي دوري جو اڃا تائين فيصلو نه ٿي سگهيو
بنگلاديش ڪرڪيٽ ٽيم کي 3 ٽيسٽ ميچز جي سيريز لاءِ ڪالهه سريلنڪا روانو ٿيڻو هو، پر اوچتو دورو ملتوي ٿيو

ڍاڪا(اسپورٽس نيوز) بنگلاديش ڪرڪيٽ ٽيم جي سريلنڪا جي دوري جو فيصلو اڃا تائين ٿي نه سگهيو آهي، بنگلاديش ڪرڪيٽ بورڊ(بي سي بي) سيريز تي پاڻي ڦرندي نظر اچي رهيو آهي. ذريعن موجب بنگلاديش ڪرڪيٽ ٽيم کي 3 ٽيسٽ ميچز جي سيريز لاءِ ڪالهه سريلنڪا روانو ٿيڻو هو، پر اوچتو دورو ملتوي ڪيو ويو. بنگلاديش ڪريڪٽ بورڊ ذريعن موجب بورڊ عملدارن کي سريلنڪا کي ڪورونا ايس او پيز قبول ناهي. ذريعن ٻڌايو ته بي سي بي سيريز ختم ٿيندي ڏسي بائيو سيڪيور ببل به ختم ڪري ڇڏيو آهي. واضح رهي ته دوري تي ويندڙ ٽيم اسڪواڊ کي بائيو سيڪيور ببل لاءِ هڪ هوٽل ۾ ترسائڻو پيو هو.

فيصل اقبال کي بلوچستان جو هيد ڪوچ بڻائڻ جي اجازت
فيصل اقبال پي آءِ اي سان هلندڙ معاملا اڪلائي ڇڏيا: پي سي بي

لاهور(اسپورٽس نيوز) پاڪستان ڪرڪيٽ بورڊ نيشنل ٽي ٽوئنٽي ڪپ لاءِ بلوچستان جي هيڊ ڪوچ جي حيثيت سان فيصل اقبال کي ڪم ڪرڻ جي اجازت ڏئي ڇڏي. پي سي بي جو چوڻ آهي ته فيصل اقبال جو اداري سان معاملو هلي رهيو هو، جيڪو هن اڪلائي ورتو آهي، جنهن بعد کيس ڊوميسٽڪ ڪرڪيٽ جي اهم ٽورنامينٽ ۾ شرڪت جي اجازت ڏني وئي آهي. پي سي بي موجب پي آءِ اي فيصل اقبال کي ڪلين چٽ ڏيڻ سان گڏ اين اوسي فراهم ڪئي اهي، جنهن کانپوءِ اڳوڻي ٽيسٽ ڪرڪيٽر کي ٻيهر ڊوميسٽڪ ٽيم جوائن ڪرڻ جي اجازت ڏني وئي.

ڊبليو ڊبليو اي جو ريسلر روڊ وارئر لاڏاڻو ڪري ويو

ڪراچي(اسپورٽس ڊيسڪ) ڊبليو ڊبليو اي جي ريسلر روڊ وارئر 60 سالن جي عمر ۾ لاڏاڻو ڪري ويو آهي. ليجنڊ ريسلر روڊ وائر جو لاڏاڻو گذريل ڏينهن هڪ ريزورٽ /ڏسو صفحو 7 بقايا 08 تي ٿيو، پر موت جا ڪارڻ سامهون نه اچي سگهيا. کيس 2011 ۾ ڊبليو ڊبليو اي هال آف فيم ۾ شامل ڪيو ويو هو، ليجنڊ ريسلر کي سڀ کان وڌيڪ ٽيگ ٽيم ميچ کيڏندي ڏٺو ويو هو. سندس وارثن پاران لاڏاڻي جي تصديق بعد ساٿي ريسلرن پاران ڏک جو اظهار ڪيو ويو آهي.

ويرات ڪوهلي جي ناقص فيلڊنگ تي تنقيد، انوشڪا ڪاوڙجي پئي

دبئي(اسپورٽس نيوز) انڊين پريميئر ليگ ۾ ڀارتي ڪرڪيٽ ٽيم جي ڪپتان ويرات ڪوهلي جي ناقص ڪارڪردگي تي تنقيد ٿي ته انوشڪا شرما ڪاوڙجي پئي ۽ هن مڙس جو دفاع ڪيو. آءِ پي ايل جي ميچ ۾ ويرات ڪوهلي جي ناقص فيلڊنگ تي اڳوڻي ڪرڪيٽرن ۽ ڪمنٽيٽرز تبصرو ڪيو، جيڪو انوشڪا شرما کي پسند نه آيو.

فيصل چٽا سميت 13 جوابدارن تي فرد جرم لاڳو: شاهد طلب
فيصل چٽا جو نالو ڪيس مان خارج ڪرڻ واري استدعا رد: ضمانت واري درخواست تي فيصلو محفوظ

ڪراچي(اسٽاف رپورٽر) بين الاقوامي گروپ سان تعلق رکندڙ بڪين خلاف ڪيس ۾ اهم اڳڀرائپ، ڪراچي جي بينڪنگ ڪورٽ فيصل چٽا سميت 13 جوابدارن تي فرد جرم لاڳو ڪري ڇڏي، جوابدارن جو ڏوهه مڃڻ کان انڪار، عدالت شاهدن کي طلب ڪري ورتو. ڪالهه ڪراچي جي بينڪنگ ڪورٽ ۾ پاڪستان سپر ليگ 2020ع ۾ ميچ فڪسنگ ۽ مني لانڊرنگ واري ڪيس جي ٻڌڻي ٿي جنهن دوران عدالت جوابدار فيصل چٽا جي هڪ ڀيرو ٻيهر ضمانت واري درخواست تي فيصلو محفوظ ڪري ورتو، عدالت چيو ته جوابدار فيصل چٽا جي ضمانت واري درخواست تي فيصلو 8 آڪٽوبر تي ٻڌايو ويندو، جڏهن ته عدالت جوابدار فيصل چٽا جونالو ڪيس مان ڪڍڻ جي استدعا رد ڪندي چيو ته ايف آءِ اي هڪ چالان ۾ جوابدار فيصل چٽا خلاف پڪيون ثابتيون ڏنيون، ٻئي چالان ۾ وري جوابدار کي ڪلين چٽ ڏئي ڇڏي، عدالت ڪلين چٽ بابت ايف آءِ اي جو پيش ڪيل چالان رد ڪري ڇڏيو هو. ڪيس ۾ جن جوابدارن تي فرد جرم لاڳو ڪئي وئي آهي، انهن ۾ گرفتار ٿيل مريندر ڪمار، نريش ڪمار، محمد فيصل عرف بوفيلا، احمد الرمغان، حنيف شيخ ۽ محمد ۽ ضمانت تي آزاد ٿيل جبار امين، آفتاب احمد عرف عاطف ڊالر شامل آهن، جڏهن ته وقاص عرف پرنس، طلحه صديقي ۽ نعمان علي به ضمانت حاصل ڪندڙن ۾ شامل آهن ايف آءِ اي موجب پي ايس ايل 2020ع ۾ بڪين هڪ ڪرڪيٽر سان به رابطو ڪيو هو، دبئي ۽ بين الاقوامي بڪين جي گروپ پاڪستان جي بدنامي لاءِ پلان جوڙيو هو، ايف آءِ اي جوابدارن جي قبضي مان موبائل فونز ۽ اهم ثابتيون حاصل ڪيون هيون.

نيڌر لينڊ جي وزير اعظم جي فٽبال تماشائين کي سخت هدايت

ايمسٽر ڊيم(اسپورٽس نيوز) نيڌر لينڊز جي وزير اعظم فٽبال ڏسڻ لاءِ ايندڙ تماشائين کي ڪورونا وائرس جي خطري کي نظر ۾ رکندي خاموش رهڻ جي هدايت ڪئي آهي. ان ڏس ۾ نيڌر لينڊز جي وزير اعظم موجب فٽبال ڏسڻ لاءِ ايندڙ تماشائين پاران گانو ۽ رڙيون ڪرڻ سان ڪورونا وائرس جي ڪوششن ۾ رڪاوٽ بڻجي سگهي ٿي.ڊچ وزير اعظم تماشائين کي هدايت ڪئي آهي ته اوهان اسٽڊيم ۾ ويهو ته خاموشي اختيار ڪيو ۽ رڙيون نه ڪيو، ان سان ڪورونا وائرس کي پکيڙ جو خدشو آهي.

آسٽريلوي آل رائونڊر مچل مارش انجري سبب آءِ پي ايل مان ٻاهر

دبئي(اسپورٽس نيوز) سن رائزرز حيدرآباد جي آسٽريلوي آل رائونڊر مچل مارش زخمي ٿيڻ جي ڪري آءِ پي ايل مان ٻاهر ٿي ويو آهي، 28 سالن جو مچل مارش رائل چيلينجرز بنگلور خلاف ميچ دوران بال ڪرائيندي انجري جو شڪار ٿي ويو هو، جنهن بعد هو آءِ پي ايل مان ٻاهر ٿي ويو آهي، سندس جاءِ تي ويسٽ انڊين ٽيسٽ ڪپتان جيسن هولڊر کي سن رائزرز حيدرآباد جي اسڪواڊ ۾ شامل ڪيو ويو آهي.

نيوزيلينڊ ڪرڪيٽ بورڊ کي پاڪستان ۽ ويسٽ انڊيز جي ميزباني جي اجازت ملي وئي
پاڪستان کي هلندڙ سال جي آخر ۾ 2 ٽيسٽ ۽ 3 ٽي ٽوئنٽي لاءِ نيوزيلينڊ وڃڻو آهي، تياريون شروع

ڪراچي(اسپورٽس ڊيسڪ)نيوزيلينڊ ڪرڪيٽ بورڊ کي پاڪستان ۽ ويسٽ انديز جي ميزباني لاءِ گهربل حڪومت جي اجازت ملي وئي.ٻئي سيريز ڪووڊ ايس او پيز تحت بند دروازي ۾ کيڏيون وينديون جڏهن ته ميزبان بورڊ پاران گرين سگنل ملندي ئي پي سي بي عملدارن نيوزيلينڊ جي دوري لاءِ انتظام شروع ڪري ڇڏيا آهن،پاڪستان ڪرڪيٽ ٽيم کي هن سال جي آخر ۾ 2 ٽيسٽ ۽ 3 ٽي ٽوئنٽي لاءِ نيوزيلينڊ وڃڻو آهي، قرنطينه پريڊ کي نظر ۾ رکندي نومبر جي ٽئين هفتي اسڪواڊ جي روانگي جو پلان تيار ڪيو پيو وڃي. نيوزيلينڊ ڪرڪيٽ عملدارن تحت نيوزيلنيڊ جي ويسٽ انڊيز ۽ پاڪستان سان سيريز جو شيڊيول ايندڙ هفتي جاري ڪيو ويندو، نيوزيلينڊ موجوده حالتن ۾ انٽرنيشنل ڪرڪيٽ جي ميزباني ڪندڙ ٽيون ملڪ هوندو. 

سنڌي ٻٽڙا ۾ ڪرڪيٽ ٽورنامينٽ: فائنل قلندري اليون کٽي ورتو
ايونٽ ۾ حيدرآباد ۽ لاڙڪاڻي ڊويزن جي 32ٽيمن ۾ دلچسپ مقابلو ٿيو

سنڌي ٻٽڙا(ن پ ا) سنڌي ٻٽڙا ۾ شھيد بينظير ڀٽو جي ياد ۾ نائٽ ڪرڪيٽ ٽيپ بال ٽورنامينٽ ڪرايو ويو، جنهن ۾ 32 ٽيمن حصو ورتو. ايونٽ ۾ حيدرآباد ۽ لاڙڪاڻي ڊويزن جي 32ٽيمن ۾ دلچسپ مقابلو ٿيو. دادو برادرس ۽ قلندري سي سي نئون ڳوٺ ٽيمون فائنل ۾ پهتيون.دادو برادرس ٽاس کٽي پهرين بيٽنگ جو فيصلو ڪيو ۽ مقرر 7 اوورن ۾ 74 رنز جو حدف ڏنو، جنهن ۾ سميع منگي 30 رنز جي اننگز کيڏي. جواب ۾ قلندري نئون ڳوٺ ٽيم 4.5 اوورن ۾ ٽارگيٽ حاصل ڪري فائنل کٽي ورتو. عرفان سولنگي عرف بندوق 40 رنز ٺاهي مين آف دي ميچ رهيو.

فواد عالم جو منفرد اسٽائل بحث جو سبب بڻجي ويو

ڪراچي: (اسپورٽس نيوز) فواد عالم جو منفرد اسٽائل بحث جو سبب بڻجي ويو. رپورٽ موجب سائوٿمپٽن ٽيسٽ ۾ ٻڙي تي ايل بي ڊليو ٿيڻ جو سبب ان کي قرار ڏنو پيو وڃي.البته ڪوچ مصباح الحق ۽ بيٽنگ ڪوچ يونس خان ان تبديلي تي ڪابه ڳالهه ناهي ڪئي. منفرد انداز ۾ بيٽنگ جي لاءِ بيهندڙ هڪ ٻئي بيٽسمين چندر پال ماضي ۾ فواد جي حوصله افزائي ڪري چڪو آهي.تفصيل موجب 10 سالن کان پوءِ ٽيسٽ ڪرڪيٽ ۾ واپس ايندڙ فواد عالم سائوٿمپٽن ۾ پهرين اننگ جي دوران بنا ڪنهن رنس ٺاهڻ جي آئوٽ ٿي ويو هو.بيٽنگ دوران ڪريز تي بيٺل هجڻ جو ان جو منفرد انداز ڌيان جو مرڪز بڻيل رهيو هو سڄيون وڪيٽون ڇڏي ليگ اسٽمپ جي ٻاهر هليو وڃي ٿو ۽ پوءِ بالر جي هٿن مان بال نڪرندي ئي سامهون اچي ويو.ڪجهه ماهرن جو خيال آهي ته ان ۾ ايل بي ڊبليو ٿيڻ جا امڪان وڌيڪ آهن ۽ انگلش پيسر ڪرس ووڪس جي بال تي فواد جي ان انداز ۾ آئوٽ ٿيڻ کي هن تاثر کي هٿي ملي.

قاصي احمد ۾ سنڌ ٽيپ بال ڪرڪيٽ ٽورنامينٽ شروع

قاضي احمد ( ن پ ا) شھيد غلام عباس چانڊيو ميموريل آل سنڌ ٽيپ بال ڪرڪيٽ ٽورنامينٽ قاضي احمد ۾ شروع ٿي ويو جنھن جو افتتاح ڊي سي نواب شاھ ابرار احمد جعفر ۽ پ پ ايم پي اي غلام قادر چانڊيو ڪيو.

رضوان مستبقل ۾ قومي ٽيم جي قيادت ڪري سگهي ٿو: راشد لطيف
وڪيٽ ڪيپر بيٽسمين محمد رضوان بهترين صلاحيتن جو مالڪ آهي: اڳوڻو ڪپتان

ڪراچي(اسپورٽس نيوز) قومي ٽيم جي اڳوڻي ڪپتان راشد لطيف چيو آهي ته وڪيٽ ڪيپر بيٽسمين محمد رضوان بهترين صلاحيتن جي ڪري مستبقل ۾ قومي ٽيم جو ڪپتان ٿي سگهي ٿو. انگلنيڊ جي دوري دوران محمد رضوان بهترين ڪارڪردگي جي ڪري سڀني کي پنهنجو مداح بڻائي ڇڏيو آهي، خاص ڪري ان جي وڪيٽ ڪيپنگ جي عالمي سطح تي واکاڻ ٿي رهي آهي. رضوان ٽيسٽ سيريز ۾ بهترني بيٽنگ جو مظاهرو ڪيو پر ان جي وڪيٽ ڪيپنگ هئي، جنهن کي ماڻهو داد ڏيڻ تي مجبور ٿي ويا، هاڻ هو ٽي ٽوئنٽي سيريز ۾ به بهترين ڪارڪردگي جو مظاهرو ڪري رهيو آهي. قومي ٽيم جي اڳوڻي ڪپتان راشد لطيف چيو ته رضوان ۾ مستقبل جو ڪپتان بڻجڻ جي صلاحيت آهي، هن پاڪستان اي ٽيم جي قيادت پڻ ڪئي آهي. هن چيو ته بالنگ سان رابطو سٺو سنوڻ آهي ۽ اهو اڳتي هلي تمام گهڻو ڪم ايندو. وڪيٽ ڪيپنگ ڪرڻ نه پر ٽيم کي هلائڻ هوندو آهي.