تازا ترين
  • *ٽنڊو غلام علي ڀرسان جهڳي کي باهه: 7 مهينن جو ٻارڙو بابو ولد ڪانجهي ڪولهي سڙي فوت*
  • *ميهڙ ٿاڻي اڳيان جهيڙو: 5 ڄڻا زخمي: ڇڏائڻ ۾ اي ايس آءِ کي به سروٽو لڳي ويو*
  • گوشت ڪيڏانهن ويو؟ ڪراچي ۾ گڏهن جون منڍيون ۽ اوجهه هٿ*اڻڄاتل ماڻهو ڪلفٽن ۾ گڏهن جي باقياتي اُڇلي ويا، جاچ ڪريون پيا ته گوشت ڪيڏانهن ويو: پوليس*
  • نئون ديرو: سڱاوتي تڪرار تان سالن هٿان ڀيڻيويو قتل*سئوٽن طاهر کي فائرنگ ڪري قتل ڪيو (نديم ککراڻي) پوليس ٻن جوابدارن کي گرفتار ڪري ورتو*
پاڪستان ۽ بنگلاديش ٽي 20 اڄ کان شروع
لاهور ۾ ٽرافي جي مهورت: ٽي ٽوئنٽي سيريز جي پهرين ميچ منجهند 2 وڳي شروع ٿيندي: ٻنهي ٽيمن جي ڪپتانن جو ميڊيا سيشن به ٿيو

لاهور(اسپورٽس نيوز) پاڪستان ۽ بنگلاديش ٽي ٽوئنٽي سيريز اڄ کان شروع ٿيندي، ٽرافي جي مهورت ڪئي وئي، شاهينن لاءِ پهرين پوزيشن بچائڻ چيلينج بڻيل آهي. لاهور جي قذافي اسٽيڊيم ۾ ٽي ٽوئنٽي سيريز جي پهرين ميچ منجهند 2 وڳي شروع ٿيندي، ٻنهي ٽيمن جي ڪپتانن جو ميڊيا سيشن به ٿيو. مهمان ٽيم کي صدر جهڙي سيڪيورٽي فراهم ڪئي وئي، قذافي اسٽڊيم ۾ ڪپتانن ٽرافي جي مهورت به ڪئي. قذافي اسٽيڊيم ۾ 10 هزار کان وڌيڪ پوليس آفيسر ۽ اهلڪار فرض نڀائيندا. پاڪستاني اسڪواڊ ۾ بابر اعظم(ڪپتان) سنڌ جو احسان علي، عماد بٽ، حارث رئوف، افتخار احمد، عماد وسيم، خوشدل شاهه، سينئر ڪرڪيٽر محمد حفيظ، محمد عامر، محمد حسنين، محمد رضوان، موسيٰ خان، شاهين آفريدي ۽ عثمان قادر به بنگلاديش خلاف ٽيم جو حصو آهن. واضح رهي ته 25 جنوري تي ٻي ٽي ٽوئنٽي ميچ لاهور ۾ کيڏي ويندي، 27 جنوري تي ٽئين ٽي ٽوئنٽي ميچ لاهور ۾ کيڏي ويندي، جڏهن ته 7 کان 11 فيبروري ٽيسٽ سيريز شروع ٿيندي، جيڪا راولپنڊي اسٽيڊيم م کيڏي ويندي، 3 اپريل واحد ون ڊي ميچ ڪراچي ۾ شيڊيول آهي.

پاڪستان ۾ سيڪيورٽي خدشا ناهن: بنگالي ڪپتان
سيڪيورٽي خدشن وارو معاملو بنگلاديش ۾ ئي ڇڏي آيا هئاسين، هاڻ رڳو ڪرڪيٽ کيڏڻي آهي: محمود الله

لاهور(اسپورٽس نيوز) بنگلاديش ڪرڪيٽ ٽيم جي ڪپتان محمود الله چيو آهي ته پاڪستان ۾ سيڪيورٽي خدشا ناهن: اسان جو ڌيان سيريز کٽڻ تي آهي. لاهور ۾ٽي ٽوئنٽي سيريز جي ٽرافي جي مهورت بعد صحافين سان ڳالهائيندي بنگلاديشي ڪپتان چيو ته سيڪيورٽي خدشن وارو معاملو بنگلاديش ۾ ئي ڇڏي آيا هئاسين، هاڻ رڳو سٺي ڪرڪيٽ کيڏڻي آهي. هن چيو ته پاڪستان نمبر ون ٽيم آهي، سيريز ۾ ڪاميابي لاءِ پرعزم آهيون، رانديگرن جا حوصلا بلند آهن. هڪ سوال جي جواب ۾ هن چيو ته جيڪو رانديگر پاڪستان نه آيو، اهو ان جو ذاتي فيصلو هو، بورڊ منهنجي قيادت ۾ ٽيم پاڪستان موڪلي آهي.

آءِ سي سي چيف ايگزيڪيوٽو جون پاڪستاني عملدارن سان ملاقاتون
مانوسواهني گهرووزارت۽ٻين عملدارن سان ملاقات بعدپي سي بي اختيارين سان گڏجاڻي به ڪئي

لاهور(اسپورٽس نيوز) آءِ سي سي جي چيف ايگزيڪيوٽو مانو سواهني پاڪستان پهچي ويو آهي. مانو سواهني سان گڏ جي ايم ڪمرشل ڪيمبل جيميسين به گڏ آهي آهي، ٻنهي اسلام آباد ۾ گهرو وزات ۽ ٻين عملدارن سان ملاقاتون ڪيون ۽ رات جو لاهور اچي ويا، ڪالهه پي سي بي عملدارن سان ملاقاتون به ڪيون ويون. آءِ سي سي جي چيف ايگزيڪيوٽو پاڪستان ڪرڪيٽ بورڊ جي چيئرمين احسان ماني سان ملاقات ڪئي، جنهن بعد عملدارن جي گڏجاڻي به ٿي، جنهن دوران پاڪستان ۾ سيڪيورٽي سميت راندين کي هٿي ڏيڻ جي حوالي سان ڳالهه ٻولهه ڪئي وئي، پي سي بي عملدارن آءِ سي سي چيف ايگزيڪيوٽو کي بريفنگ پڻ ڏني.

آءِ سي سي وويمنزڪرڪيٽ ورلڊڪپ2021ع جي شيڊيول جواعلان
ورلڊ ڪپ 6 فيبروري کان 7 مارچ تائين نيوزيلينڊ ۾ کيڏيو ويندو: آءِ سي سي

دبئي(اسپورٽس نيوز) انٽرنيشنل ڪرڪيٽ ڪائونسل(آءِ سي سي) وومينز ڪرڪيٽ ورلڊ ڪپ 2021ع جي شيڊيول جو اعلان ڪيو ويو آهي، جنهن جي ميزباني نيوزيلينڊ ڪندو. آءِ سي سي موجب وومينز ڪرڪيٽ ورلڊ ڪپ ايندڙ سال يعني 2021ع ۾ 6 فيبروري کان 7 مارچ تائين نيوزيلينڊ ۾ کيڏيو ويندو. وومينز ڪرڪيٽ ورلڊ ڪپ جون ميچز نيوزيلينڊ جي 6 شهرن ۾ کيڏيون وينديون، جڏهن ته ورلڊ ڪپ جي مڪمل شيڊيول جو اعلان مارچ ۾ ڪيو ويندو. پاڪستان ڪرڪيٽ بورڊ(پي سي بي) انٽرنيشنل ڪرڪيٽ ڪائونسل وومينز ورلڊ ڪپ لاءِ 15 رڪني اسڪواڊ جو اعلان به ڪري ڇڏيو آهي، جنهن ۾ اڳوڻي ڪپتان ثناءَ مير جو نالو شامل ناهي.

محمد حفيظ جي بالنگ ٽيسٽ 29 جنوري تي ٿيندي

لاهور(اسپورٽس نيوز) قومي ڪرڪيٽر محمد حفيظ جي بالنگ ٽيسٽ 29 جنوري تي لمز يونيورسٽي لاهور ۾ ٿيندي. انگلينڊ جي ڊوميسٽڪ ڪرڪيٽ ۾ سندس بالنگ ايڪشن شڪي قرار ڏنو ويو هو، جنهن بعد کيس بالنگ کان روڪيو ويو، ڪرڪيٽر کي ٻيهر ٽيسٽ جو چيو ويو هو، جيڪا 29 جنوري تي ورتي ويندي.

پاڪستان جي دوري جي سزا: ڀارت بنگلاديش جي ميزباني کان انڪار ڪري ڇڏيو
بي سي سي آءِ بنگلاديش سان ايشيا اليون، ورلڊ اليون ميچن مان هڪ جي ميزباني تان يوٽرن ورتو

نئين دهلي(اسپورٽس نيوز) بنگلاديش ڪرڪيٽ ٽيم جي پاڪستان جي دوري کانپوءِ ڀارتي ڪرڪيٽ بورڊ بنگلاديش سان گڏجي ايشيا اليون ۽ ورلڊ اليون ميچن مان هڪ جي ميزباني کان انڪار ڪري ڇڏيو آهي. بنگلاديش بورڊ باقاعده اعلان ڪيو آهي ته ڀارت هاڻي شيخ مجيب جي 100هين سالگرهه جي موقعي تي شيڊيول 2 ٽي ٽوئنٽي ميچزن مان هڪ جي ميزباني نه ڪندو ۽ هاڻي اهي ميچ 18 ۽ 22 مارچ تي ميرپور ۾ کيڏيون وينديون. ان کان اڳ ڀارت اعلان ڪيو هو ته هو 100 ملين ڊالرن سان تيار سردار پٽيل اسٽيڊيم ۾ هڪ ميچ جي ميزباني ڪندو، پر هاڻي اسٽيڊيم جي تعمير جو بهانو بڻائي انڪار ڪيو آهي.

پي سي بي پاران پي ايس ايل جي تيارين لاءِ ٻن ڏينهن وارا اهم اجلاس طلب

ڪراچي (اسپورٽس نيوز) پي ايس ايل ويجهو ايندي ئي پي سي بي جاڳي پيو، تيارين جي حوالي سان 2 ڏينهن وارو اهم اجلاس سومر تي لاهور ۾ شروع ٿيندو.اجلاس ۾ ٽڪيٽن ۽ سيڪيورٽي سميت سمورن معاملن تي ڳالهيون ڪيون وينديون. پاڪستان سپر ليگ جو پنجون ايڊيشن 20 فيبروري تي شروع ٿي رهيو آهي. هن ڀيري مڪمل پي ايس ايل جي شروعات هوم گرائونڊ تي ٿيندي آهي. ميچن جي ميزباني چئني شهرن ڪراچي، لاهور، راولپنڊي ۽ ملتان کي ڏني وئي آهي.

بنگلاديش ڪرڪيٽ ٽيم کي لاهور ۾ فول پروف سيڪيورٽي ڏني آهي: عثمان بوزدار

لاهور(اسپورٽس نيوز) پنجاب جي وڏي وزير عثمان بوزدار چيو آهي ته بنگلاديش جي ڪرڪيٽ ٽيم کي لاهور آمد تي ڀليڪار ڪريون ٿا، بنگلاديش ڪرڪيٽ ٽيم جي پاڪستان آمد سان ملڪ ۾ انٽرنيشنل ڪرڪيٽ مڪمل طور بحال ٿي وئي، هاڻي ٻين ٽيمن کي به پاڪستان اچي کيڏڻ گهرجي، هن چيو ته واضح ٿي ويو ته پاڪستان سيڪورٽي لحاذ سان محفوظ ملڪ آهي، مهمان ٽيم کي بهترين سيڪيورٽي فراهم ڪئي آهي، قذافي اسٽيڊيم ٻاهران ۽ اندران فول پروف انتظام ٿيل آهن.

پاڪ-بنگلاديش ميچن جي لاءِ ٽريفڪ پلان جاري: ڪرڪيٽ جي شوقينن لاءِ خاص پيغام

لاهور(اسپورٽس نيوز) لاهور ۾ پاڪستان ۽ بنگلاديش وچ ۾ کيڏي ويندڙ 3 ٽي ٽوئنٽي ميچز لاءِ ٽريفڪ پلان جاري ڪيو ويو آهي. لاهور پوليس موجب قذافي اسٽيڊيم ۾ پاڪستان ۽ بنگلاديش وچ ۾ ميچن دوران شهري متبادل رستا اختيار ڪن، جيڪي پوليس جي آفيشل ويب سائيٽ تي موجود آهن. ان کانسواءِ ميچ ڏسڻ لاءِ ايندڙ شوقينن کي ٽڪيٽ ۽ سڃاڻپ ڪارڊ کڻي اچڻ جي هدايت ڪئي وئي آهي، پارڪنگ ايريا ۾ گاڏي بيهارڻ بعد شٽل سروس استعمال ڪرڻي پوندي.

پاڪستان وومين ٽيم جي ڪراچي ۾ پريڪٽس شروع

ڪراچي(اسپورٽس نيوز) پاڪستان وومين ڪرڪيٽ ٽيم ورلڊ ڪپ جي حوالي سان تياريون شروع ڪري ڇڏيون آهن، نيشنل اسٽيڊيم ڪراچي ۾ رانديگرياڻين پريڪٽس سيشن ۾ حصو ورتو، ڪوچ بيٽنگ، بالنگ ۽ فيلڊنگ جي حوالي سان رانديگرياڻين کي ٽپس به ڏنيون. واضح رهي ته پاڪستاني ٽيم کي پهرين وارم اپ ميچ کيڏڻي آهي، ان حوالي سان رانديگرياڻيون پرعزم آهن.

ٽي ٽوئنٽي مينز ورلڊ ڪپ 2021ع ۾ ٿيندو، آءِ سي سي شيڊيول جاري ڪري ڇڏيو
ورلڊ ڪپ کي چيمپئن ٽرافي جي جاءِ تي آندو ويو، هاڻ 10 بدران 6 ٽيمون ميدان تي لهنديون

دبئي(اسپورٽس نيوز) ٽي ٽوئنٽي ورلڊ ڪپ 2021ع ۾ ٿيندو، آءِ سي سي شيڊيول جاري ڪري ڇڏيو. انٽرنيشنل ڪرڪيٽ ڪائونسل جي ويب سائيٽ تي جاري ٿيل تفصيلن موجب چيمپئن ٽرافي کي ٽي ٽوئنٽي ورلڊ ڪپ ۾ تبديل ڪيو ويو آهي، جنهن ۾ هاڻ 10 بدران 16 ٽيمون ميدان تي لهنديون. ورلڊ ڪپ ڀارت ۾ شروع ٿيندو، آفريڪا سميت 5 ملڪن ۾ ايونٽ جون ميچز ٿينديون.

بابر پهريون ڀيروهوم گرائونڊتي قومي ٽيم جي قيادت ڪندو
2007ع ۾ پاڪستان ۽ ڏکڻ آفريڪا ۾ کيڏيل ٽيسٽ ميچ دوران قذافي اسٽيڊيم ايندو هئس: بابر اعظم

لاهور(اسپورٽس نيوز) ڪرڪيٽ جي سڀ کان بهترين بيٽسمين بابر اعظم بنگلاديش خلاف اڄ شروع ٿيندڙ سيريز ۾ پاڪستان جي قيادت ڪري رهيو آهي، 25 سالن جو ڪرڪيٽر 13 سال اڳ قذافي اسٽيڊيم تي بال پڪڙڻ جي حيثيت سان ذميواريون نڀائيندو هو، هو 2007ع ۾ پاڪستان ۽ ڏکڻ آفريڪا وچ ۾ ٽيسٽ سيريز جي ٻي ٽيسٽ ميچ ۾ بال پڪڙيندو رهيو.بابر اعظم سيپٽمبر 2016ع ۾ پاڪستان پاران انٽرنيشنل ڊيبيو ڪيو هو، پر 24 سال اڳ آءِ سي سي ٽي ٽوئنٽي رينڪنگ ۾ پهرين، ون ڊي ۾ ٽئين ۽ ٽيسٽ ڪرڪيٽ ۾ ستين نمبر جو بيٽسمين آهي. بابر اعظم دنيا جو ٻيو نمبر بيٽسمين آهي، جنهن جي ٽي ٽوئنٽي فارميٽ ۾ رنز جي ايوريج 50 کان وڌيڪ آهي. هو 36 ٽي ٽوئنٽي ميچن ۾ 50.17 جي ايوريج سان 1405 رنز ٺاهيون آهن، ڀارت جي ڪپتان ويرات ڪوهلي جي ٽي ٽوئنٽي ڪرڪيٽ ۾ رنز ٺاهڻ جي ايوريج 52 کان وڌيڪ آهي. بابر اعظم سيپٽمبر 2019ع ۾ پاڪستان ٽي ٽوئنٽي ڪرڪيٽ ٽيم جو ڪپتان نامزد ٿيو، آسٽريليا خلاف ٽي ٽوئنٽي سيريز ۾ پاڪستان جي قيادت ڪندڙ بابر اعظم پهريون ڀيرو پنهنجي هوم گرائونڊ، قذافي اسٽِڊيم لاهور ۾ ڪپتان جي حيثيت سان ميدان تي لهندو. بابر اعظم چيو ته ڪرڪيٽ سان محبت ۽ چاهه اڄ ڪاميابي ڏياري آهي، ڪاميابي ۾ کوڙ سارن ماڻهن جو هٿ آهي، جن جو ٿورائتو آهيان، بنگلاديش جي ڀيٽ ۾ پاڪستاني ٽيم مضبوط آهي، هوم سيريز ۾ ڪاميابي لاءِ پرعزم آهيون. هن وڌيڪ چيو ته گذريل10سالن ۾ ٻين ملڪن طرفان ڊيبيو ڪندڙ ڪرڪيٽرن سان ڀيٽيو وڃي ته اسان جي ڏکيائين جو اندزو ٿي ويندو.

ڏکڻ آفريڪا جي اڳوڻي آل رائونڊر ڪيلس اڌ ڏاڙهي ۽ شهپر ڪوڙائي ڇڏيا

ڪراچي(اسپورٽس ڊيسڪ) ڏکڻ آفريڪا جي اڳوڻي اسٽار آل رائونڊر جيڪس ڪيلس اڌ ڏاڙهي ۽ شهپر ڪوڙائي سڀني کي حيران ڪري ڇڏيو. ڏکڻ آفريڪا جي اڳوڻي ڪرڪيٽر اڌ ڏاڙهي ۽ شهپر ڪوڙي تصوير سوشل ميڊيا تي شيئر ڪئي ته نئون بحث ڇڙي ويو. ڪيلس ٽوئٽر تي ڪيپشن ۾ لکيو ته ڪجهه ڏينهن دلچسپ هوندا ۽ اهو سڀ گينڊي جي نسل جي تحفظ ۽ گالف جي بهتري لاءِ ڪيو آهي. واضح رهي ته جيڪس جانورن لاءِ مهم شروع ڪئي آهي.

مڪلي ۾ ڪرڪيٽ جو فائنل انٽر ٽيم کٽي ورتو

ٺٽو (رپورٽر) مڪلي جي ڪاليج ۾ جاري اسپورٽس گالا 2020ع جاري آهي، ڪاليج جي ڪرڪيٽ گرائونڊ ۾ ڪرڪيٽ جي فائنل ميچ ڊگري ڪاليج ٺٽو جي فرسٽ ايئر ۽ انٽر جي شاگردن جي ٽيمن وچ ۾ کيڏي وئي، فرسٽ ايئر ٽيم پهريان کيڏندي مقرر اوورن ۾ 98 رنز ٺاهيون. جواب ۾ انٽر جي ٽيم نائين اوور ۾ حدف حاصل ڪري فائنل کٽي ورتو. خالد بروهي کي 29 رنز ٺاهڻ ۽ 3 وڪيٽون وٺڻ تي مين آف دي ميچ جي اعزاز سان نوازيو ويو. ان موقعي تي ڪاميابي ماڻيندڙ ٽيم ۽ هارائيندڙ اليون کي ٽرافي ۽ انعامن سان پڻ نوازيو ويو. آهي.

قاضي احمدراندين جي سرگرمين کان محروم،سرڪارگرائونڊنه ڏنا
دولتپور صفن، شاهپور جهانيان ۽ قاضي احمد ۾ هڪ به گرائونڊ ناهي، نوجوان روڊن تي ڪرڪيٽ کيڏن ٿا

قاضي احمد (رپورٽ: الھرکيو سيال) قاضي احمد تعلقي جي ٽن شھرن دولتپور صفن، شاھپورجهانيان ۽ قاضي احمد راندين جي گرائونڊن کان محروم هئڻ سبب رانديگر مايوس آهن، جڏهن ته سرڪار نوٽيس نه ورتو. ڪرڪيٽ، ڪوڏي ڪوڏي، ونجهه وٽي، بيڊمنٽن، والي بال سميت ٻين راندين جي شوقينن جو وڏو انگ هئڻ باوجود سرڪار گرائونڊ نه ڏنا آهن، جنهن ڪري نوجوان اسڪولي گرائونڊن توڙي توڙي روڊ رستن تي راندين جون سرگرميون ڪن ٿا. اهڙي ريت قاضي احمد ۾ به اسپورٽس اسٽيڊيم ناهي، نوجوان مايوسي جو شڪار نظر اچن ٿا.