تازا ترين
  • ڪراچي جي مختلف علائقن ۾ هلڪي ۽ تيز برسات، موسم خوشگوار*سُپر هاءِ وي، نارٿ ڪراچي، ڊفينس ۽ ڪلفٽن سوڌو ڀرپاسي ۾ وسڪارو* برسات کانپوءِ هيٺائين علائقن ۾ پاڻي بيهڻ شروع، انتظاميه الرٽ*
  • سنڌ ۽ بلوچستان جي ساحلي پٽيءَ تي گجگوڙ سان برسات جو امڪان، شهري ٻوڏ جو خطرو، وڏي وزير چونڊيل نمائندن جي ڊيوٽي لڳائي ڇڏي*برسات دوران سنڌ ۽ مڪران جي ساحل تي سامونڊي ويرون طوفان جيان هونديون: موسميات کاتو*صوبائي وزير ناصر شاهه جي ڪي ايم سي، ڊي ايم سيز، واٽر بورڊ، واسا ۽ ٻين لاڳاپيل ادارن کي متحرڪ رهڻ جي هدايت*

ڪراچي سميت سنڌ جي مختلف شهرن ۾وسڪارو:بجلي غائب

حيدرآباد،نوابشاهه،بدين،ميرپورخاص، ڄامشورو، عمرڪوٽ، خيرپور، ٿر ۽ مٽياري ضلعن جي ڪيترن ئي علائقن ۾ وسڪارو

ڪراچي (اسٽاف رپورٽر) ڪراچي سميت سنڌ جي ڪيترن ئي هنڌن تي تيز وسڪاري سبب بجلي جو نظام ڌرم برهم ٿي ويو. ڪراچي ۾ طوفاني برساتن بعد اڪثر علائقن توڙي روڊ رستن تي وري گوڏي جيڏو پاڻي بيهجي ويو. حيدرآباد، ٺٽو، شهيد بينظير آباد، بدين، ميرپورخاص، ڄامشورو، عمرڪوٽ، خيرپور، سانگهڙ، ٿرپارڪر ۽ مٽياري ضلعن جَي ڪيترن ئي علائقن ۾ تيز هوا سان وسڪارو جاري آهي. موسميات کاتي ڪراچي ۽ حيدرآباد ۾ تيز برساتن بعد شهري ٻوڏ جو خدشو ظاهر ڪندي چيو آهي ته تيز برسات جو سلسلو ڇنڇر تائين جاري رهي سگهي ٿو.

سنڌ ۾ ڪورونا وگهي وڌيڪ 5 مريض فوت، 386 نوان ڪيس ظاهر، انگ هڪ لک 2 هزار 759 ٿي ويو

ڪراچي(اسٽاف رپورٽر) سنڌ ۾ ڪورونا وگهي وڌيڪ 5 مريض فوت ٿي ويا، 386 نوان ڪيس سامهون اچڻ کانپوءِ صوبي ۾ وائرس سٽيلن جو تعداد هڪ لک 2 هزار 759 ٿي ويو آهي. وڏي وزير سيد مراد علي شاهه ڪورونا جي حوالي سان انگ اکر جاري ڪندي چيو آهي ته هيل تائين ڪورونا وائرس وگهي فوت ٿيل مريضن جو انگ 22 سئو 50 ٿي ويو آهي. وڏي وزير چيو آهي ته گذريل 24 ڪلاڪن دوران 522 مريض ٺيڪ ٿي ڪري گهرن ڏانهن هليا ويا، هيل تائين صحتياب ٿيلن جو تعداد هڪ لک 14 هزار 518 ٿي ويو آهي. وڏي وزير چيو آهي ته هن وقت 5 هزار 991 مريض علاج هيٺ آهن، جن مان 250 مريضن جي حالت ڳڻتي جوڳي آهي ۽ 49 مريض وينٽي لينٽرز تي آهن. وڏي وزير موجب ڪراچي ۾ 226 نوان ڪيسز رپورٽ ٿيا، عمر ڪوٽ ۾ 20، سانگهڙ ۾ 16، بدين، شڪارپور ۽ ٺٽي ۾ وڌيڪ 10 _ 10 ڪيسز ظاهر ٿيا آهن. وڏي وزير چيو آهي ته حيدرآباد ۽ ٽنڊو محمد خان ۾ 7_ 7، گهوٽڪي ۽ خيرپور ۾ 6 _ 6 جڏهن ته ڄامشوري ۾ 5 ڪيس سامهون آيا آهن. وڏي وزير چيو آهي ته ميرپور خاص، قمبر، سجاول، سکر، ۽ ٽنڊو الهيار ۾ 4_ 4، شهيد بينظير آباد ۾ 3، ۽ دادو ۾ 2 ڪيس رپورٽ ٿيا آهن.

مطيع الله جان اغوا ڪيس: پوليس آفيسر ڪرسي گرم ڪرڻ لاءِ نه، پر ڀڄ ڊڪ لاءِ هوندا آهن: سُپريم ڪورٽ

اسلام آباد ( بيورو رپورٽ) سُپريم ڪورٽ صحافي مطيع الله جان جي اغوا ڪيس بابت پوليس جي رپورٽ کي رد ڪري ڇڏيو، چيف جسٽس گلزار احمد آءِ جي اسلام آباد عامر ذوالفقار تي ڪاوڙ جو اظهار ڪندي چيو آهي ته آءِ جي صاحب! ڪهڙي دور ۾ رهو ٿا، جاچ ۾ 10 منٽ به نڪري ويا ته شاهديون ضايع ٿي وينديون آهن. سپريم ڪورٽ ۾ چيف جسٽس گلزار احمد جي سربراهي ۾ ٻه رڪني بئنچ صحافي مطيع الله جي اغوا بابت ڪيس جي ٻڌڻي ٿي، جنهن سلسلي ۾ آءِ جي پنجاب عدالت ۾ پيش ٿيو.ٻڌڻي دوران چيف جسٽس چيو ته اسلام آباد پوليس بابو جيان ليٽر بازي ڪري رهي آهي، جاچ ۾ ته هڪ هڪ منٽ قيمتي هوندو آهي، پوليس ڪهڙي قسم جي رپورٽ پيش ڪئي آهي؟.چيف جسٽس ريمارڪس ڏنا ته مطيع الله جان جي اغوا ڪيس ۾ پوليس کي ڄاڻ گڏ ڪرڻي هئي، توهان پاڻ نه ڪجهه سکيو ۽ نه سيکاريو آهي، پوليس آفيسر ڪرسي گرم ڪرڻ لاءِ نه، پر ڀڄ ڊڪ لاءِ هوندا آهن.سُپريم ڪورٽ صحافيءَ جي اغوا معاملي تي تفصيلي رپورٽ طلب ڪندي چيو آهي ته هاڻي وڌيڪ ليٽر بازي ناهي ڪرڻي، عدالت توهين عدالت ڪيس ۾ صحافي مطيع الله جان کي وڪيل ڪرڻ لاءِ چئن هفتن جي مهلت ڏئي ڇڏي.

وفاقي سرڪار پاران ملڪ ۾ ريسٽورنٽس،سئنيماگهر،ٿيئٽر،پبلڪ پارڪس، عجائب گهر، بزنس سينٽر، ۽ بيوٽي پارلرز 10 آگسٽ کان کولڻ جو اعلان

اين سي او سي جي اجلاس جي صدارت ڪندي وفاقي وزير اسد عمر سياحتي ماڳ به 8 آگسٽ کان کولڻ جو اعلان ڪري ڇڏيو
ٽرينز ۽ جهازن تي محدود سفر جِي پابندي ختم ڪئي ويندي،سيپٽمبر جَي آخر تائين محدود مسافر سفر ڪري سگهندا:اسد عمر

اسلام آباد (بيورو رپورٽر) وفاقي سرڪار سموري ملڪ ۾ ريسٽورنٽس، ڪَيفي، سئنيما گهر، ٿيئٽر، پبلڪ پارڪس، عجائب گهر، بزنس سينٽر، ايڪسپو هالز ۽ بيوٽي پارلرز 10 آگسٽ کان کولڻ جو اعلان ڪري ڇڏيو. سياحتي ماڳ به 8 آگسٽ کان کوليا ويندا. اين سي او سي جَي اجلاس دوران وفاقي وزير اسد عمر شادي هالز 15 سيپٽمبر کان کولڻ جو اعلان ڪندي چيو آهي ته مزارن ۽ روڊ ٽرانسپورٽ کي ايس او پيز تحت کولڻ جِي اجازت ڏني پئي وڃي. اسد عمر چيو ته ٽرينز ۽ جهازن تي محدود سفر جِي پابندي ختم ڪندي سيپٽمبر جَي آخر تائين محدود مسافر سفر ڪري سگهندا. وفاقي وزير چيو ته ڪوڏي ڪوڏي، ملهه ۽ باڪسنگ تي پابندي برقرار رکڻ جو اعلان ڪيو. اسد عمر تماشائين بنا سماجي فاصلي وارين راندين جون سرگرميون بحال ڪرڻ جو به اعلان ڪيو.

پاڪستان جَي نئين سياسي نقشي تي رڳو اسان جِي اپوزيشن ۽ ڀارت کي اعتراض آهي: وفاقي وزير مراد سعيد

اوهان جِي مني لانڊرنگ سبب پاڪستان گري لسٽ ۾ هليو ويو: مراد سعيد

اسلام آباد (بيورو رپورٽر) وفاقي وزير مراد سعيد چيو ته گڏيل اسيمبلي جي اجلاس کي خطاب ڪندي چيو ته پاڪستان جَي نئين سياسي نقشي تي رڳو اسان جِي اپوزيشن ۽ ڀارت کي اعتراض آهي، اپوزيشن تي تنقيد ڪندي مراد سعيد چيو ته اوهان جِي مني لانڊرنگ سبب پاڪستان گري لسٽ ۾ هليو ويو.

هر پاڪستاني،هر ڪشميري کي خبر آهي ته حڪومت ڪشمير تي سودو ڪري ڇڏيو آهي: پ پ چيئرمين بلاول ڀٽو گڏيل پارليامينٽ جي اجلاس کي خطاب

پارليامينٽ ۾ ڪشمير بابت ٺهراءُ منظور ٿي ويو پر وزيراعظم ايوان ۾ موجود ناهي:بلاول
عمران خان رڳو پنهنجي پارٽي ۽ ٽوئيٽر جو وزيراعظم آهي: بلاول ڀٽو زرداري

اسلام آباد (بيورو رپورٽر) پيپلزپارٽي چيئرمين بلاول ڀٽو گڏيل پارليامينٽ جَي اجلاس کي خطاب ڪندي چيو ته هر پاڪستاني، هر ڪشميري کي خبر آهي ته حڪومت ڪشمير تي سودو ڪري ڇڏيو آهي. بلاول چيو ته حڪومت ڪشمير جِي حيثيت تبديل ڪرڻ تي رڳو هڪ منٽ جِي خاموشي ۽ نقشو تبديل ڪري ڀارت کي جواب ڏنو. هن چيو ته عمران خان رڳو پنهنجي پارٽي ۽ ٽوئيٽر جو وزيراعظم آهي. پارليامينٽ ۾ ڪشمير بابت ٺهراءُ منظور ٿي ويو پر وزيراعظم ايوان ۾ موجود ناهي.

سنڌ جي وڏي وزير ڪراچي، حيدرآباد ۽ ميرپورخاص ڊويزن ۾ تيز برسات دوران صورتحال کي منهن ڏيڻ لاءِ چونڊيل نمائندن جي ڊيوٽي لڳائي ڇڏي

وڏي وزير طرفان چونڊيل نمائندن کي 9 آگسٽ تائين پنهنجن ضلعن ۾ رهڻ جِي هدايت
گُجر نالي، ڪورنگي ۽ “مَواڇ ڳوٺ نالَي” تي ايف ڊبليو او ڪم ڪري رهي آهي:اين ڊي ايم اي

ڪراچي (اسٽاف رپورٽر) سنڌ جَي وڏي وزير مراد علي شاهه ڪراچي، حيدرآباد ۽ ميرپورخاص ڊويزن ۾ تيز برسات دوران ضلعي سطح تي صورتحال کي منهن ڏيڻ لاءِ وزيرن، خصوصي معاونن ۽ چونڊيل نمائندن جِي ڊيوٽي لڳائي ڇڏي. وڏي وزير طرفان چونڊيل نمائندن کي 9 آگسٽ تائين پنهنجن ضلعن ۾ رهڻ جِي هدايت ڪئي. اين ڊي ايم اي ڪراچي ۾ نالن جِي صفائي بابت تفصيل جاري ڪندي چيو آهي ته گُجر نالي، ڪورنگي ۽ “مَواڇ ڳوٺ نالَي” تي ايف ڊبليو او ڪم ڪري رهي آهي. ٽنهي نالن ۾ 45 مان 35 چوڪنگ پوائنٽس کي ڪليئر ڪيو ويو آهي، گُجر نالو 80 سيڪڙو، ڪورنگي نالو 85 ۽ مواڇ ڳوٺ نالو 76 سيڪڙو صاف ڪرڻ جِي دعويٰ ڪئي آهي.

سکر پوليس جي ڪشمور جي ڪچي واري علائقي ۾ ڪارروائي: سائٽ ايريا مان اغوا ٿيل نوجوان بازياب

سکر (رپورٽر) ڪشمور جي ڪچي واري علائقي ۾ سکر پوليس ڪارروائي ڪري هڪ هفتو اڳ سکر مان اغوا ٿيل علي گوهر عرف خيرمحمد ڍيهو کي بازياب ڪرايو. ايس ايس پي موجب ٻه هفتا اڳ سکر جي سائيٽ ايريا واري علائقي مان تيغاڻي ٽولي پاران اغوا ڪيل نوجوان کي بازياب ڪرايو ويو.

ڪراچي جي ڀٽائي آباد ۾ قتل ٿيل جان محمد ڀٽو جي قتل جو ڪيس 6 جوابدارن مٿان داخل

ڪراچي (اسٽاف رپورٽر) ڀٽائي آباد واري علائقي ۾ قتل ٿيل جان محمد ڀٽو جي قتل جو ڪيس 6 جوابدارن مٿان داخل ڪيو ويو. ڪيس ۾ وقار، وسيم، شاهنواز ۽ سندن والد ذوالفقار سميت اڻڄاتل جوابدار کي نامزد ڪيو ويو. مقتول جي ڀاءُ موجب سندس ڀاءُ کي ملڪيت جي تڪرار تان قتل ڪيو ويو آهي. هن چيو ته سندس ڀاءُ حيدرآباد ۾ مزدوري ڪندو هو عيد تي ملڻ آيو هو. هن چيو ته جوابدار ڌر گهر وٺڻ چاهيو انڪار تي سندس ڀاءُ کي قتل ڪيو ويو. هنن چيو ته جوابدار ڌر قبضي خور آهي سمورا جوابدار گرفتار ڪري انصاف ڪيو وڃي.

پاڪستان ڪلڀوشن ياديو جي معاملي تي ڀارت کي هڪ ٻيو موقعو ڏيڻ لاءِ سفارتي رابطو ڪيو آهي: پرڏيهي کاتي جي ترجمان عائشه فاروقي

دنيا ۾5آگسٽ تي والاريل ڪشمير ۾ ڀارتي ظلم خلاف آواز اٿاري ڀارتي هڪطرفي قدم رد ڪيو ويو
گذريل سال او آءِ سي جا ٽي اجلاس ٿيا، جنهن ڪشمير بابت مضبوط بيان ڏنو: عائشه فاروقي

اسلام آباد ( بيورو رپورٽر) هفتيوار بريفنگ ڏيندي پرڏيهي کاتي جي ترجمان عائشه فاروقي چيو ته سڄي دنيا ۾ 5 آگسٽ تي والاريل ڪشمير ۾ ڀارتي ظلم خلاف آواز اٿاريو ويو ۽ وادي ۾ ڀارتي هڪ طرفي قدم کي رد ڪيو ويو، هيومن رائيٽس واچ به ڀارتي غير قانوني قدم بابت بيان ڏنو. هن چيو ته پاڪستان جو سياسي نقشو جاري ڪرڻ وقت جي ضرورت هئي، جنهن بابت پارلياماني ميمبرن کي اعتماد ۾ ورتو ويو، نقشي ۾ ڄمون ۽ ڪشمير کي پاڪستان جو حصو ڏيکارڻ ٻٽو معيار نه آهي. پرڏيهي کاتي جي ترجمان چيو ته گذريل سال او آءِ سي جا ٽي اجلاس ٿيا، جنهن ڪشمير بابت مضبوط بيان ڏنو، پر هاڻ او آءِ سي مضبوط ۽ قائداڻو ڪردار ادا ڪري، سعودي عرب سان ڀائراڻا لاڳاپا قائم آهن. سندس چوڻ هو ته اسلام آباد هاءِ ڪورٽ جي حڪم تي ڪلڀوشن لاءِ وڪيل مقرر ڪرڻ بابت ڀارت سان سفارتي رابطو ڪيو ويو آهي، هاڻ ان طرفان جواب جو انتظار آهي. عائشه فاروقي چيو ته پاڪستاني حڪومت ۽ عوام بيروت ڌماڪن ۾ انساني جانين تي تعزيت ڪن ٿا، ڌماڪن ۾ ٻه پاڪستاني خاندان به متاثر ٿيا آهن، جن مان هڪ ٻارڙو شهيد به ٿيو آهي، جڏهن هڪ خاندان جي زال مڙس جي حالت ڳڻتي جوڳي ٻڌائي پئي وڃي.

بخشاپور ويجهو جوابدار ڏير هٿان قتل ٿيل عورت نظيران گولو جي قتل جو ڪيس 3 ڄڻن مٿان داخل

بخشاپور (ن پ ا) گبلو ٿاڻي جي حد ۾ جوابدار ڏير هٿان قتل ڪيل نوجوان عورت نظيران گولو جي قتل جو ڪيس سندس چاچي حبيب الله گولو جي فرياد تي عبدالله گولو ۽ ٻن اڻڄاتل جوابدارن مٿان داخل ڪيو ويو. ڪيس داخل ٿيڻ بعد مقتولا جي قتل ۾ ملوث جوابدارن کي پوليس گرفتار نه ڪري سگهي. پوليس موجب جوابدارن جي گرفتاري لاءِ ڪارراويون جاري آهن کين جلد قانون جي ڪٽهڙي ۾ آندو ويندو.

ٽنڊو ڄام: بيماري تي ضابطو نه آيو، جنسون پنجاب مان آڻڻ جو انڪشاف، ادارا رڳو رپورٽون ٺاهڻ ۾ رڌل

ڪمند جي فصل کي لڳل فيوريزيم فنگس نالي بيماري ٻين هنڌن تي به ڦهلجڻ جو خدشو ظاهر ڪيو ويو
سنڌ زرعي تحقيق اداري جي پيٿالوجي شعبي جي ماهرن رڳو رپورٽ تيار ڪري خاموشي اختيار ڪري ڇڏي

ٽنڊو ڄام (رپورٽ: مبين مگسي ) ٽنڊي الهيار ۾ ڪمند کي لڳل فيوريزيم وائرس تي ضابطو نه آيو، زرعي تحقيق ادارن رڳو سکڻي رپورٽ ٺاهي جمع ڪرائي ڇڏي، بيماري جو علاج زميندار پاڻ ڪرڻ لڳا، متاثر ٿيل ٻئي جنسون پنجاب جي فيصل آباد جي ريسرچ اداري جون هجڻ جو انڪشاف. رپورٽ موجب ڪمند جو حب سڏجندڙ ٽنڊو الهيار ضلعي جي يو سي ڌڱاڻو بوزدار ۾ ڪمند جي فصل کي لڳل فيوريزيم فنگس نالي بيماري ٻين هنڌن تي به ڦهلجڻ جو خدشو ظاهر ڪيو ويو آهي، بيماري سبب شگر ملون بند هجڻ ڪري ڪمند وقت کان اڳ ڪٽائي ڪري وڪرو ڪرڻ تي مجبور ٿي ويا آهن، هوڏانهن ذريعن جو چوڻ آهي ته سنڌ زرعي تحقيق اداري جي پيٿالوجي شعبي جي ماهرن رڳو رپورٽ تيار ڪري جمع ڪرائي ماٺ ڪري ڇڏي آهي، جڏهن ته عملي طور ڪي به قدم نه کنيا ويا آهن. ان ڏس ۾ رابطي ڪرڻ تي زرعي تحقيق اداري جي سائنسدان جبار ميمڻ ٻڌايو ته ڄاڻايل بيماري کان بچڻ لاءِ احتياطي تدبيرون جاري ڪيون آهن، هن چيو ته هاڻي زمين خراب ٿي چڪي آهي، اسان پنهنجي رپورٽ ۾ لکي چڪا آهيون ته ٻج اڳ ئي خراب هو، ڪمند جي آبادگارن کي گهرجي ته اهڙيون جنسون لڳائين جن ۾ بيمارين کي منهن ڏيڻ جي سگهه هجي، هن چيو ته جيڪي جنسون لڳل آهن اهي پنجاب جون آهن، جيڪي بنا چڪاس جي لڳايون ويون. هوڏانهن متاثر آبادگار جو چوڻ آهي ته جوس وارا ڪمند ٻين جڳهن تان 350 رپيا مڻ خريد ڪري اچن ٿا، جڏهن ته هي ڪمند 200 رپيا في مڻ ۾ به خريد نٿا ڪن، جنهن ڪري وڏو نقصان ٿي رهيو آهي. هن چيو ته رڳو ٽنڊو الهيار ضلعي ۾ ڪجهه جوس وڪرو ڪندڙ خريداري ڪري رهيا آهن.

شگر ملن جي مرضي سان جنسون پوکڻيون پون ٿيون: آبادگار بورڊ

شگر مل وارا اهڙيون جنسون پوکڻ لاءِ زور ڀرين ٿا جن مان کنڊ وڌيڪ ٺهي

ٽنڊو ڄام: سنڌ آبادگار بورڊ جي ترجمان اسلم نواز مري رابطي ڪرڻ تي ٻڌايو ته سنڌ ۾ پنهنجون سٺيون جنسون نه هجڻ ڪري شگر ملن جي مرضي سان ٻيون جنسون پوکيون وڃن ٿيون، هن ٻڌايو ته شگر مل مافيا رڳو اهڙيون جنسون پوکڻ لاءِ زور ڀري ٿي جنهن مان کنڊ وڌيڪ ٺهي ٿي، هن چيو ته جيڪڏهن ڪجهه آبادگار وري ٻيون جنسون پوکين ٿا ته انهن کي چيو ويندو آهي ته هنن جي ڪٽائي آخر ۾ ڪجو، زميندار اهڙي جنس کي ترجيح ڏين ٿا جنهن ۾ وزن گهڻو هجي، جڏهن ته ان جنس کي وري شگر ملون گهٽ اهميت ڏين ٿيون، جنهن ڪري سنڌ جا زميندار مجبورن شگر ملن جي مرضي سان جنسن جي پوکي ڪن ٿا، هن جو چوڻ هو ته ڪمند جي جن جنسن جي سنڌ حڪومت پاران منظوري مليل هوندي آهي اهي به شگر ملز وارا پوکڻ ناهن ڏيندا، هن چيو ته جڏهن انهن جنسن ۾ بيماري لڳي ٿي ته علاج لاءِ به شگر ملن وارا دوائون ڏين ٿا.

قمبر جي ڳوٺ الله بخش مغيري جو رهواسي ٽريڪٽر جي ٽڪر لڳڻ سبب لاڙڪاڻي جي اسپتال ۾ فوت

لاڙڪاڻو (رپورٽر) قمبر جي ڳوٺ الھ بخش مغيري جو رهواسي پيرسن جعفر مغيري ٽريڪٽر جو ٽڪر لڳڻ سبب سخت زخمي ٿي پيو. پيرسن کي ڳڻتي جوڳي حالت ۾ چانڊڪا اسپتال منتقل ڪيو ويو جتي هن زخمن جا سٽ نه سهندي دم ڌڻي حوالي ڪيو.

روهڙي ريلوي اسٽيشن تان حيدرآباد واسي 70 ورهين جي پيرسن جو لاش هٿ: اسپتال منتقل

روهڙي (ن پ ا) ريلوي اسٽيشن جي بڪنگ آفيس ڀرسان 70 سالا پيرسن جو لاش ھٿ ڪيو ويو. پيرسن جي سڃاڻپ غلام خان پٽ محمود طور ٿي جنهن جو لاش ريلوي پوليس کڻائي تعلقا اسپتال روهڙي پھچايو. پوليس موجب پيرسن جي سڃاڻپ ڪارڊ تي سندس رهائشي پتو حيدرآباد جي لطيف آباد واري علائقي جو لکيل آهي.

Breaking News
  • حڪومت ڪشمير ۾ ٿيندڙ ظلم تي ڀارت کي ڪهڙو جواب ڏنو: پ پ چيئرمين

  • اسلام آباد: حڪومتي قدمن مان اسان مطمعن ناهيون: پ پ چيئرمين

  • ڪشمير جو سودو ٿي چڪو آهي: حڪومت ملوث آهي: پ پ چيئرمين

  • مودي والاريل ڪشمير ۾ اڪثريت کي اقليت ۾ تبديل ڪيو: بلاول

  • موجوده حڪومت ملڪي وقار کي نقصان پهچايو:بلاول ڀٽو زرداري

  • برسات کانپوءِ هيٺائين علائقن ۾ پاڻي بيهڻ شروع، انتظاميه الرٽ

  • سُپر هاءِ وي، نارٿ ڪراچي، ڊفينس ۽ ڪلفٽن سوڌو ڀرپاسي ۾ وسڪارو

  • ڪراچي جي مختلف علائقن ۾ هلڪي ۽ تيز برسات، موسم خوشگوار

آئوٽ آف ڪورس پيپر ڇو ڏنو اٿوَ؟سعيد آباد پي ٽي سي ۾ اپر ڪورس لاءِ امتحان ڏيندڙ سب انسپيڪٽرز آپي مان نڪري ويا: جهيڙو، سي سي ٽي فٽيجز وائرل

جهيڙي ۽ امتحاني پيپرز ڦاڙڻ وارا سي سي ٽي وي فٽيجز سامهون اچي ويا

ڪراچي (اسٽاف رپورٽر) سعيد آباد ٽريننگ سينٽر ۾ سنڌ پوليس ۾ اپر ڪورس لاءِ امتحان ڏيندڙ سب انسپيڪٽرز ڪورس کان ٻاهران سوال اچڻ تي آپي مان نڪري ويا. جهيڙي ۽ امتحاني پيپرز ڦاڙڻ وارا سي سي ٽي وي فٽيجز سامهون اچي ويا. اميدوارن جو چوڻ آهي ته رولز موجب اپر ڪورس 6 مهينن جو هوندو آهي، پر 11 مهينا گذرڻ باوجود ڪورس جَي حوالي سان ڪجهه نه پڙهايو ويو، اهڙي صورتحال ۾ امتحان ڪيئن ٿا ڏئي سگهون. هنن چيو ته اعليٰ آفيسرن جِي غلط پاليسين سبب مستقبل خطري ۾ پئجي ويو آهي.

شهباز شريف ۽ حمزه شهباز خلاف سنجيده ڪيس آهن، کين تعويز ڪرائڻ گهرجن: شيخ رشيد

آصف زرداري کي ڪا به پرواهه نه آهي، هُن ڪرمنل پروسيجر ۾ پي ايڇ ڊي ڪئي آهي: وفاقي وزير
ڪيترائي ڀيرا چئي چڪو آهيان ته ايندڙ 4 کان 5 مهينا انتهائي اهم آهن

اسلام آباد ( بيورو رپورٽ) ريلوي واري وفاقي وزير شيخ رشيد چيو آهي ته شهباز شريف ۽ حمزه شهباز خلاف سنجيده ڪيس آهن، کين تعويز ڪرائڻ گهرجن. اسلام آباد ۾ پريس ڪانفرنس ڪندي وفاقي وزير شيخ رشيد چيو آهي ته آصف زرداري کي ڪا به پرواهه نه آهي، هُن ڪرمنل پروسيجر ۾ پي ايڇ ڊي ڪئي آهي ۽ پُٽ کي پريس ڪانفرنسز تي رکي ڇڏيو اٿس.شيخ رشيد چيو آهي ته اي پي سي 15 سيپٽمبر تائين نه ٿي ته پوءِ محرم الحرام اچي ويندو، ڪيترائي ڀيرا چئي چڪو آهيان ته ايندڙ 4 کان 5 مهينا انتهائي اهم آهن.هن چيو آهي ته عمران خان پنج سال پورا ڪندو ۽ جلد اپوزيشن طرفان مطالبو ڪيو ويندو ته نيب ختم ڪريو.هن چيو آهي ته اسان عمران خان سان گڏ آهيون، نيب آزاد ادارو آهي، کنڊ اسڪينڊل سوڌو ڪنهن به ڪيس ۾ حڪومتي ماڻهن کي به طلب ڪري سگهي ٿو.

ڳڙهي ياسين واسي ٻه نوجوان شعيب ۽ محراب وڌيو سکر ويندي پراسرار نموني گم: وارثن پاران اغوا جو شڪ ظاهر

نوجوان سکر وڃي رهيا هيا ته لکي پهچڻ شرط رابطو ڪٽجي ويو: گم ٿيلن جا وارث

ڳڙھي ياسين (ن پ ا) ڳوٺ قائم خان وڌيو جا رھواسي ٻه نوجوان شعيب ۽ محراب وڌيو موٽرسائيڪل تي سکر ويندي پراسرار نموني گم ٿي ويا. نوجوانن جي وارثن اغوا جو شڪ ظاهر ڪري ڇڏيو. وراثن موجب نوجوان سکر وڃي رهيا هيا ته سندن سان لکي پهچڻ وقت رابطو ڪٽجي ويو. هنن چيو ته ڪجهه ڪلاڪن بعد نوجوان شعيب جي نمبر تان ڪال آئي جنهن اهو چئي ڪال بند ڪئي ته ٻنهي کي گرفتار ڪيو ويو آهي. هنن چيو ته سکر جي مختلف ٿاڻن تي پڇاڳاڇا بعد سندن پتو نه پيو آهي. هنن وس وارن کان نوجوانن جي بازياب لاءِ اپيل ڪئي.

حيدرآباد هاءِ ڪورٽ بار ايسوسيئيشن جي صدر وارو عهدو تڪراري بڻجي ويو: خالي پيل عهدي تي فرهاد ابڙو صدر نامزد

ٻه سال اڳ بار جي چونڊن ۾ ٻيو نمبر ايندڙ اميدوار سرڪٽ بينچ ۾ فيصلي کي چيلنج ڪري ڇڏيو
بار جي صدر لاءِ 15 سال وڪالت جو تجربو ضروري آهي:درخواستگذار جڳديش آر مولاڻي

حيدرآباد ( رپورٽر) هاءِ ڪورٽ بار ايسوسيئيشن جي صدر وارو عهدو تڪراري بڻجي ويو. سنڌ بار ڪائونسل پاران 6 مهينن بعد خالي پيل عهدي تي قائم مقام صدر لاءِ ايڊووڪيٽ فرهاد علي ابڙو کي نامزد ڪيو ويو. جنوري 2018ع ۾ بار جي چونڊن ۾ ٻيو نمبر ايندڙ اميدوار جڳديش آر مولاڻي سنڌ هاءِ ڪورٽ سرڪٽ بئنچ ۾ سنڌ بار جي فيصلي کي چئلينج ڪري ڇڏيو. درخواستگذار موجب بار جي صدر لاءِ 15 سال وڪالت جو تجربو ضروري آهي جيڪو سنڌ بار ڪائونسل پاران نامزد وڪيل جو مڪمل ناهي. عدالت ڌرين کي نوٽيس جاري ڪندي 18 آگسٽ تائين جواب طلب ڪري ورتو. جنوري 2020ع ۾ اڳوڻي صدر نثار احمد دراني کي اليڪشن ڪميشن جو عهدو ملڻ بعد بار جي صدر وارو عهدو 6 مهينن تائين خالي پيل هو.

سنڌ هاءِ ڪورٽ نيب کان پوليس ۾ غيرقانوني ڀرتين بابت رپورٽ طلب ڪري ورتي

ڪراچي(اسٽاف رپورٽر) سنڌ هاءِ ڪورٽ نيب کان پوليس ۾ غيرقانوني ڀرتين واري معاملي تي جاچ جي اڳڀرائي رپورٽ طلب ڪري ورتي آهي. ايس پي غلام نبي ڪيريو جي ضمانت واري درخواست تي ٻڌڻي دوران سندس وڪيل بئريسٽر ميان مشتاق دليل ڏنا. درخواستگذار جي وڪيل دليل ڏيندي چيو آهي ته ڪيس جو مُک جوابدار اڳوڻو آءِ جي غلام حيدر جمالي ضمانت تي آزاد آهي، جيڪڏهن مُک جوابدار کي ضمانت ملي ٿي ته ٻيا جوابدار به ضمانت جا حقدار آهن، پر ايس پي غلام نبي ڪيريو اڃا تائين جيل ڀوڳي رهيو آهي. هن چيو ته ٻيا جوابدار يا ته ضمانت تي ٻاهر آهن يا سلطاني شاهد بڻجي آزاد ٿي ويا آهن. واضح رهي ته ڪيس ۾ اڳوڻي آءِ جي غلام حيدر جمالي، ايس پي فدا حسين ۽ غلام نبي ڪيريو سميت 8 پوليس آفيسرز جوابدار نامزد آهن جن مٿان ايس آر پي ۾ ساڍا 500 کان وڌيڪ اهلڪار غيرقانوني طور ڀرتيون ڪرڻ جو الزام آهي. عدالت درخواستگذار جا دليل ٻڌڻ کانپوءِ نيب کان اڳڀرائي جي رپورٽ طلب ڪندي ڪيس جي وڌيڪ ٻڌڻي 27 آگسٽ تائين ملتوي ڪري ڇڏي.

سانگهڙ ۾ ٽريڪٽر اسڪيم مد ۾ ڳوٺاڻن جا جعلي اڪائونٽ کولي ڪروڙين رپيا ڪڍڻ جو انڪشاف، نيب جو ڳوٺاڻن کي نوٽيس

ضلعي سانگهڙ ۾ سنڌ بينڪ ذريعي سوين ماڻهن جا جعلي اڪائونٽ کولي 25 لک في ماڻهو جي اڪائونٽ مان ڪڍيا ويا، ٽريڪٽر جي خريداري بابت ماڻهو بي خبر
ھڪ ئي ڳوٺ جي 137 ماڻهن جا فيڪ اڪائونٽ کولي 25 لک في ماڻهو نڪرڻ بعد نيب پاران ڄاڻايل ماڻهن کي 13 آگسٽ تي پيش ٿيڻ لاءِ نوٽيس جاري ڪيو ويو

سانگهڙ(رپورٽ: مير حسن مري) سانگهڙ سنڌ حڪومت جو ڪارنامو ٽريڪٽرن جي اسڪيم جي مد ۾ ضلعي سانگهڙ ۾ سنڌ بينڪ ذريعي سوين ماڻهن جا جعلي اڪائونٽ کولي 25 لک في ماڻهو ڪڍيا ويا ٽريڪٽر جي خريداري لاءِ ماڻهو بي خبر .سانگهڙ جي ھڪ ئي ڳوٺ جي 137 ماڻهن جا فيڪ اڪائونٽ کولي 25 لک في ماڻهو ڪڍيا ويا نيب پاران ڄاڻايل ماڻهن کي 13 آگسٽ تي پيش ٿيڻ جو نوٽيس جاري2013 ۾ انھن جا اڪائونٽ کوليا ويا انھن مان ھڪ گل محمد ولد بختيار خاصخيلي 2012 ۾ فوت ٿي چڪو آهي ان جي نالي تي به جعلي اڪائونٽ کولي 25 لک ڪڍيا ويا انھن ۾ 50 کان وڌيڪ عورتون شامل آهن جن جي نالن تي جعلي اڪائونٽ کولي 25 لک ڪڍيا ويا سنڌ حڪومت آبادگارن کي ٽريڪٽرن ڏيڻ جي اسڪيم شروع ڪئي پر جن ماڻهن جي نالن تي جعلي اڪائونٽ کولي 25 لک ڪڍيا و يا انھن جي نالن تي زمين جو کاتو به ناهي اھي غريب مزدور ماڻهو آهن ھوڏانھن سانگهڙ جي ڳوٺ نظر علي نظاماڻي جي ڳوٺاڻن عبدالستار نظاماڻي، عبدالڪريم دودو، مسمات ڀلي، ياسمين ۽ ٻين ٻڌايو ته اسان غريب مسڪين ماڻهو آهيون اسان کي ڪابه خبر نه آهي نيب جو نوٽيس اچي ويو ته توهان درخواست ڏني آهي ٽريڪٽر لاءِ توهان جي نالي تي اڪائونٽ کولي 25 لک في ماڻهو ڪڍيا ويا آهن ھنن چيو ته اسان وٽ زمين ناهي ۽ نه ئي ڪا اسان درخواست ڏني نه اڪائونٽ کولرايو آهي نه پئسن جي خبر آهي اسان غريب مزدور مسڪين ماڻهو آهيون اسان سخت پريشان آهيون رابطي ڪرڻ تي مختيارڪار سانگهڙ رشيد ڪاڪا ٻڌايو ته تعلقي سانگھڙ ۾ 100 کان وڌيڪ ماڻهو آهن جن کي اسان نيب جا نوٽيس پهچايا آهن.

بدين ضلعي ۾ سم نالن جي کاٽي نه ٿيڻ ڪري برساتن دوران تباهي جو خدشو، رهواسي پريشان

اي بي اوڊي۾پوندڙننڍن وڏن سم نالن16ايل،16اي ايل،4آر سم نالوسميت ٻين جي کاٽي نه ٿي سگهي
ضلعي جي ننڍن وڏن سم نالن جي کاٽي نه ٿيڻ ۽ گهارا بند نه ٿيڻ سبب رهواسي پريشانين جو شڪار

ٽنڊوباگو(رپورٽ انور عباسي) بدين ضلعي ۾ 2011ع وارين برساتن ۾ تباهي مچائيندڙ سم نالن جي کاٽي نه ٿيڻ ڪري امڪاني برساتن سبب ضلعو ٻيهر سم نالن ذريعي ٻڏڻ جو خدشو پيدا ٿي ويو آھي، جڏهن ته سرڪاري رڪارڊ ۾ سم نالن جي کوٽائي ڏيکاري سر زمين تي ڪو به عملي ڪم نه ڪيو ويو آھي، ان ڏس ۾ بدين ضلعي جي مُک تعلقي ٽنڊي باگي جي سينهائو، ڏاڏاھ، خليفو قاسم کان گُذرندڙ ۽ شادي لارج تائين ويندڙ شيخ منظور سم نالو پنجاب جو پاڻي کڻي سنڌ ۾ داخل ٿئي ٿو، ان سم نالي سميت ننڍن وڏن سم نالن جن ۾ 16 ايل، 16 اي ايل، 4 آر، چاوڙا سم نالو، اولياءِ خانشاهه سم نالو، ٽنڊوباگو سٽي سم نالو، پينگهارو سم، چروو سم نالو، لاشاري سم نالو سميت ڪيترن ئي سم نالن جي کوٽائي نه ٿيڻ ۽ ڪپر نه ٻڌڻ سبب ڇهين آگسٽ کان شروع ٿيندڙ برساتن سبب تباهي جو امڪان موجود آھي، سرڪاري ذريعن دعويٰ ڪئي آھي ته سرڪاري رڪارڊ ۾ ڄاڻايل سم نالن جي ڪيترائي ڀيرا کاٽي ڏيکاري وئي آھي. پر سرزمين تي سم نالن جو حشر انتهائي بُرو آھي جنهن سبب گولاڙچي، بدين، ڪڍڻ، لنواري، نندو، شادي لارج، کوسڪي، پنگريو، خليفو قاسم، اڊوڙي ٽيل، سينهائو، بکو چانڊيو، ٿوهي شريف، نوتڪاڻي موڙ، سلطان سينهڙو، يوسف چاوڙو، ٽنڊوباگو شهر سميت ڪيترائي ننڍا وڏا ڳوٺ ٻُڏڻ جو خدشو آهي، بدين ضلعي ۾ سم نالن جي کاٽي نه ڪرائڻ ۽ سم نالن جي ٽٽل ڪپرن کي اربين رپين جي بجيٽ ملڻ باوجود نه مرمت نه ٿيڻ سبب امڪاني برساتن ۾ وڏي نقصان جو انديشو آهي جڏهن ايريگيشن ۽ ڊرينج کاتي جي ستن سب ڊويزنن جون چارجون رکندڙ ايس ڊي او فياض قمبراڻي موقف وٺڻ جي رابطو ڪرڻ تي هن انڪار ڪري ڇڏيو

ڄامشوري جي ڪراچي واهه ۾ وهنجندي 10 ورهين جو نينگر شهزور سنجراڻي ٻڏي فوت: گهر ۾ ڪهرام

ڄامشورو (رپورٽر) ڪراچي واهه ۾ وهنجندي ڏهن ورهين جو نينگر ٻڏي فوت ٿي ويو. نينگر جي سڃاڻپ ڄامشوري جي غريب آباد علائقي جي شهزور سنجراڻي پٽ راڻو سنجراڻي طور ڪئي وئي. نينگر جو لاش مقامي ٽوٻن ذريعي واهه مان ڪڍي لمس اسپتال منتقل ڪيو ويو. جتان ضروري ڪارراوئين بعد نينگر جو مڙهه وارثن حوالي ڪيو ويو.

نيب کي ختم ڪيو وڃي ٻي صورت ۾ اهو پاڪستان کي ختم ڪري ڇڏيندو، ڪا هڪ پارٽي اڪيلي ان کي ختم نٿي ڪري سگهي:شاهد خاقان

2ورهين کان انڪوائري شروع ڪئي وئي آهي پر ريفرنس داخل نه ٿي سگهيو آهي:اڳوڻو وزيراعظم
هر ادارو تباهه ٿي رهيو آهي، ماڻهو مصيبت ۾ آهن، نيب کي ختم ڪيو وڃي:شاهد خاقان عباسي

اسلام آباد (بيورو رپورٽر) اڳوڻي وزيراعظم شاهد خاقان عباسي چيو ته 2 ورهين کان انڪوائري شروع ڪئي وئي آهي پر ريفرنس داخل نه ٿي سگهيو آهي. هن چيو ته سندس ۽ گهرڀاتين جي هر ٽرانزيڪشن نيب جي حوالي ڪئي وئي، هو ۽ سندس پٽ انهن جي پئسن تي ٽيڪس ادا ڪن ٿا. شاهد خاقان عباسي چيو ته هو نيب کي ختم نه ڪري سگهيا، ڪا هڪ پارٽي اڪيلي ان کي ختم نٿي ڪري سگهي. سندس چوڻ هو ته هر ادارو تباهه ٿي رهيو آهي، ماڻهو مصيبت ۾ آهن، نيب کي ختم ڪيو وڃي ٻي صورت ۾ اهو پاڪستان کي ختم ڪري ڇڏيندو. اڳوڻي وزيراعظم شاهد خاقان عباسي چيو ته حڪومت 2 ورهين ۾ ڪنهن اداري جو سربراهه مقرر نه ڪري سگهي، حڪومت لاءِ ڪم ڪرڻ لاءِ ڪو تيار ناهي.

طاقتور شخص 15 سال هراسان ڪندو رهيو پر ڪنهن کي نه ٻڌايو: عائشه عمر

انڊسٽري ۾ عمر ۾ مون کان ٻيڻو ۽ طاقتور شخص 15 سال هراسان ڪندو رهيو پر چپ رهيس

ڪراچي (انٽرٽينمينٽ ڊيسڪ) مشهور پاڪستاني اداڪارا عائشه عمر هڪ ڀيرو ٻيهر جنسي هراساني بابت ڳالهائيندي انڪشاف ڪيو آهي ته کيس انڊسٽري ۾ عمر ۾ ٻيڻو طاقتور شخص هراسان ڪندو رهيو ۽ هو 15 ورهين تائين چپ رهي. عائشه عمر اداڪارا ۽ ڊائريڪٽر روز ميڪگوان سان انسٽاگرام تي لائيو سيشن دوران مختلف موضوعن سان گڏوگڏ شوبز انڊسٽري ۾ جنسي هراساني واري موضوع تي به ڳالهه ٻولهه ڪئي. نجي خابرو ويب سائيٽ موجب سندس چوڻ هو ته جڏهن مان انڊسٽري ۾ پير رکيا ته ان وقت منهنجي عمر 23 سال هئي ۽ ان وقت منهنجي عمر ۾ ٻيڻي طاقتور ماڻهو مون کي جنسي هراساني جو نشانو بڻايو ۽ اهو سلسلو ورهين تائين هلندو رهيو. اداڪارا ٻڌايو ته اهو رڳو هڪ ڀيرو نه ٿيو، اهو سلسلو ڪيترائي سال هلندو رهيو پر مان ان تي ڪا ڪارروائي ڪرڻ نه چاهي هئي. هن چيو ته ان وقت مون سان جيڪو ٿي رهيو هو مان ان کي جيئن هڪ دٻي ۾ بند ڪري ڇڏيو ۽ چيو ته ٺيڪ آهي اهو منهنجي زندگي ۾ ٿي رهيو آهي ۽ مون کي ان کي منهن ڏيڻو آهي. عائشه عمر چيو ته 15 سالمان اها ڳالهه ڪنهن کي نه ٻڌائي ڇو ته مان اها ڳالهه ڪنهن سان شيئر نه ڪرڻ چاهيندي هيس،مان ان کي اتي ئي رهڻو ڏنو، ڪنهن کي نه ٻڌايو ۽ نيٺ مان ٻه سال اڳ ان بابت ڳالهايو. اداڪارا وڌيڪ ٻڌايو ته هن مون کان پڇيو ته انڊسٽري ۾ جنسي هراساني ٿيندي آهي ۽ اهو پهريون ڀيرو هو جو مان چيو هو ته ها ائين ٿيندو آهي. عائشه عمر چيو ته هن مون کان پڇيو هو ته ڇا اوهان سان ائين ٿيو آهي ۽ مان چيو ها ۽ مان ان تي ڪنهن ڏينهن ڳالهائيندي پر اڄ نه.

ڪورونا سبب “مولان” کي آن لائن رليز ڪرڻ جو اعلان

لاس اينجلس (انٽرٽينمينٽ ڊيسڪ) سموري دنيا ۾ ڪورونا وائرس سبب سينما هالز بند آهن ۽ ڪيترين ئي فلمن جي رليز روڪي وئي آهي. وارنر برادرز ان جي ابتڙ ڊزني جي پنهنجي ميگا بجيٽ واري لائيو ايڪشن فلم “مولان” کي وڏي پردي تي رليز ڪرڻ بدران آن لائن رليز ڪرڻ جو اعلان ڪري ڇڏيو آهي. ڊزني اسٽوڊيو جي چيف ايگزيڪٽو آفيسر تصديق ڪئي ته مولان کي ايندڙ مهيني 4 سيپٽمبر تي ويب اسٽريمنگ ڊزني پلس تي رليز ڪيو ويندو. ڊزني پلس ويب سائيٽ ڪمپني جي پنهنجي سبسڪرپشن ويب سائيٽ آهي جتي اسٽوڊيو جون ٻيون فلمون به رليز ٿي چڪيون آهن.

بيروت ڌماڪن شوبز فنڪارن جا هيانءَ ڏاري وڌا، افسوس جو اظهار

ٽوئٽر تي لبنان لاءِ دعاڪريو،بيروت ڌماڪاٽرينڊبڻجي ويا،سڄي دنياپاران ڏک جواظهارڪيوويو
عائشه عمر واقعي کي اذيت ناڪ قرار ڏنو، فيروز خان پاران افسوس جو اظهار

ڪراچي (انٽرٽينمينٽ ڊيسڪ) لبنان جي راڄڌاني بيروت جي بندرگاهه واري علائقي ۾ هڪ ڏينهن اڳ ٿيل ڌماڪن سوين ماڻهو مارجي ۽ هزارين زخمي ٿي پيا. ڌماڪن تي جتي سڄي دنيا جي سياستدانن ۽ اهم شخصيتن افسوس جو اظهار ڪيو اتي پاڪستاني توڙي پرڏيهي فنڪارن به ڌماڪن تي افسوس جو اظهار ڪندي لبناني عوام لاءِ محبت جو اظهار ڪيو. بيروت ڌماڪن کانپوءِ ٽوئٽر تي لبنان لاءِ دعا ڪريو، ۽ بيروت ڌماڪا جهڙا ٽرينڊز به بڻجي ويا ۽ ماڻهن افسوس جو اظهار ڪيو. اداڪارا عائشه عمر پنهنجي ٽوئيٽ ۾ بيروت ڌماڪن کي خوفناڪ ۽ اذيت ناڪ قرار ڏيندي لکيو ته اسان جون همدرديون لبناني عوام لاءِ آهن. فيروز خان به بيروت ڌماڪن تي افسوس جو اظهار ڪندي لکيو ته هو ڌماڪن ۾ زخمي ٿيلن جي جلد صحتيابي لاءِ دعاگو آهي ۽ سندس همدرديون لبناني عوام سان گڏ آهن. ڳائڻي عاصم اظهر به پنهنجي ٽوئيٽ ۾ لبناني عوام لاءِ دعا ڪئي. حمزا علي عباس واقعي کي هيان ڏاريندڙ قرار ڏنو. اداڪارا مهوش حيات ڌماڪن جون تصويرن کي دهشت ناڪ قرار ڏيندي متاثر ماڻهن لاءِ نيڪ خواهشن جو اظهار ڪيو. وينا ملڪ لبناني عوام سان ايڪي جو اظهار ڪندي نيڪ خواهشن جو اظهار ڪيو ۽ لکيو ته هو اهڙي خيال مان ئي ڊڄي ٿي ته لبناني عوام تي ڌماڪن سبب ڇا گذري رهيو هوندو. اداڪار همايون سعيد تباهي جي هڪ تصوير شيئر ڪندي لبنان لاءِ دعا ڪئي ۽ مداحن کي به دعا جي اپيل ڪئي. فيصل قريشي ۽ فخر عالم به بيروت ڌماڪن تي افسوس جو اظهار ڪيو. ٻئي پاسي ترڪش اداڪارا ايسرا بلجڪ ٽوئيٽ ڪندي لکيو ته هي سڀ دهشتناڪ، خوفناڪ ۽ نقابلِ بيان آهي. هن ڏک جو اظهار ڪندي لکيو ته متاثرن جي ڏک ۾ برابر جا شريڪ آهيون. هوڏانهن ارطغرل غازي جي هيرو انجين التان به مداحن کي لبنان لاءِ دعائن جي اپيل ڪئي.

خانپور مهر واسي عورتاڻي آواز تي هرکجي اغوا ٿيل نوجوان کي ڪچو ٻنڊي پوليس پاران بازياب ڪرائڻ جي دعويٰ ا

گهوٽڪي (رپورٽر) خانپور مهر واسي اغوا ٿي ويل نوجوان بلاول مهر کي ڪچو ٻنڊي پوليس مقابلي دوران بازياب ڪرائڻ جي دعويٰ ڪئي آهي. پوليس موجب ڏوهاري مغوي کي هڪ هنڌ کان ٻئي هنڌ منتقل ڪري رهيا هيا ته مقابلي ڪري بازياب ڪرايو. ياد رهي ته مغوي بلاول مهر 15 ڏينهن اڳ عورتاڻي آواز تي هرکجي اغوا ٿي ويو هو.

پٿورو ويجهو نوجوان اشوڪ ڪولهي وڻ ۾ رسو ٻڌي ڦاهو کائي آپگهات ڪري ڇڏيو:گهر ۾ ڪهرام

پٿورو (ن پ ا) غلام نبي شاھ ٿاڻي جي حد سيد اميرعلي شاھ جي زرعي فارم تي نوجوان اشوڪ پٽ جيٺو ڪولھي وڻ ۾ رسو ٻڌي ڦاهو کائي آپگهات ڪري ڇڏيو. اطلاع تي پوليس واقعي واري هنڌ پهچي نوجوان جو مڙهه اسپتال منتقل ڪيو جتي ضروري ڪارروائين بعد لاش وارثن حوالي ڪيو ويو.

فورم ۾ توهان به مختلف مسئلن يا موضوعن تي بحث ۾ حصو وٺي
سگهو ٿا.

هاڻ رڳو صحافي نه پر توهان به پنهنجي علائقي جا مسئلا اجاگر ڪري سگهو ٿا، جنهن لاءِ خبرون، تصويرون ۽ فوٽيجز هن نمبر 03022610318 تي واٽس ايپ ڪريو.

ٽنڊوغلام حيدر: باهه سبب 12 گهر سڙي رک ٿي ويا

April 9, 2019

رپڙي: گرلس اسڪول ۾ ماسترياڻيون مقرر نه ٿيون!

April 2, 2019

اڄ جي تصوير

مضمون

ماڪڙ کانپوءِ ڪمند تي فيوزرم ويلٽ وائرس جو حملو: زراعت جو ڇاٿيندو؟؟؟

ايڊيٽوريل

ڪشمير مسئلو ۽ مخالف ڌر جي يڪجهتي

ايم بي سومرو

عشق، فيضو ۽ ڌرتي

حيدر ملاح

Little Boy جي آندل وڏي تباهي

غضنفر سولنگي

هڪ خاموش خدمتگار جي وسري ويل ورسي

شوڪت ميمڻ

5 آگسٽ کان 17 آگسٽ تائين جو سفر !

مسرور سيال